Job 14
14:1 Huta kah a sak hlang he a khohnin toi tih khoponah khaw hah.
14:2 Rhaipai bangla phuelh tih a oh uh. Khokhawn bangla yong tih pai voel pawh.
14:3 Te soah ngawn tah na mik tueng tih kai he na taengkah laitloeknah dongla na khuen.
14:4 Rhalawt lamloh a cuem la aka khueh te unim? Pakhat pataeng om pawh.
14:5 A khohnin neh a hla taenah khaw namah taengah hangdang. A oltlueh te a oltlueh bangla na saii tih poe thai pawh.
14:6 Anih lamloh vawl mangthong lamtah amah hnin at kutloh bangla a ngaingaih hil toeng saeh.
14:7 Thing ham tah a vung akhaw ngaiuepnah om pueng. Te dongah koep mikhing vetih a dawn khaw ngoeng mahpawh.
14:8 Diklai khuiah a yung patong mai tih laipi khuiah a ngo duek cakhaw,
14:9 tui bo ah duei vetih thinghloe bangla a pae cawn ni.
14:10 Tedae hlang tah duek tih rhaa uh coeng. Hlang he a pal phoeiah tah melam a om.
14:11 Tuitunli lamkah tui khaw khawk dae tuiva loh a khah vaengah tah kak.
14:12 Hlang khaw yalh tih thoo voel pawh. Vaan a om pawt due khaw haenghang pawh. Amih te ih kung lamloh haenghang uh mahpawh.
14:13 Unim saelkhui ah a paek lah ve? Kai he nan khoem lah vetih na thintoek a mael duela kai nan thuh lah mako. Kai hamla oltlueh na khueh vetih kai nan poek mako.
14:14 Hlang he duek koinih hing venim? Kamah kah caempuei hnin boeih he ka thovaelnah a pawk hil ka lamtawn bitni.
14:15 Nan khue vaengah kai loh nang te ka doo bitni. Na kut dongkah bibi dongah na moo bitni.
14:16 Ka khokan he na tae pawn vetih ka tholhnah khaw na dawn mahpawh.
14:17 Ka boekoek hnocun khuiah catui a hnah thil tih kai kathaesainah na dah thil bitni.
14:18 Tedae Tlang khaw cungku tih moelh. Lungpang pataeng a hmuen lamloh thoeih.
14:19 Lungto khaw tui loh a hoh tih a kongnawt loh diklai laipi a yo. Te dongah hlanghing kah ngaiuepnah na pal sak.
14:20 Anih te a yoeyah la na khulae tih a hmai a tal la a van daengah anih te na tueih.
14:21 A ca rhoek a thangpom uh dae a ming moenih. Muei uh cakhaw amih a yakming moenih.
14:22 Tedae a pumsa tah a taengah tih thak a khoeih tih a hinglu khaw amah hamla nguekcoi,” a ti.