Job 15
15:1 Te phoeiah Temani Eliphaz loh a doo.
15:2 Te vaengah, “Aka cueih loh khohli mingnah neh a doo vetih a bung ah kanghawn a hah sak aya?
15:3 A taengah hmaiben pawt tih a hoeikhang pawh olthui te ol neh a tluung aya?
15:4 Nang aisat, hinyahnah na muei sak tih Pathen mikhmuh kah thuepnah khaw na bim.
15:5 Na ka loh namah kathaesainah a cang tih thaai ol na coelh.
15:6 Na ka loh nang m'boe sak tih kai long moenih. Na hmuilai long ni namah te n'doo.
15:7 Hlang lamhma la n'sak tih som a om hlan lamloh n'yom coeng a?
15:8 Pathen kah baecenol te na yaak tih namah hamla cueihnah na buem a?
15:9 Ka ming uh pawt te metlam na ming tih kaimih taengah amah a om pawt khaw na yakming?
15:10 Sampok khaw, mamih taengkah patong khaw na pa lakah a khohnin khuet coeng ta.
15:11 Pathen loh hloephloeinah neh na taengah dikdik a cal ol nang hamla vawt a?
15:12 Balae tih na lungbuei na a khuen? Balae tih na mik loh a mikmuelh?
15:13 Na thintoek te Pathen taengla na hooi tih na ka lamloh ol na tha.
15:14 Huta kah a sak te mebang hlanghing nim aka cim tih aka tang te?
15:15 A hlangcim khuikah a hlangcim koek pataeng tangnah pawt tih vaan pataeng amah mikhmuh ah a cil moenih.
15:16 Tui bangla dumlai aka mam hlang, a tueilaeh neh a rhonging aisat a.
15:17 Nang taengah kan thui eh kai ol he hnatun dae. Ka hmuh te kan tae eh.
15:18 Te te hlangcueih rhoek loh a thui uh tih a napa rhoek taeng lamloh a phah uh moenih.
15:19 Amih te amamih bueng ham khohmuen a paek vaengah amih lakli ah kholong a nuen sak moenih.
15:20 Halang tah hnin takuem amah kilkul tih hlanghaeng ham a kum tarhing la khoem uh.
15:21 Ngaimongnah khuiah pataeng anih aka rhoelrhak ham a hna ah birhihnah ol a pawk pah.
15:22 Hmaisuep lamloh mael ham tangnah pawt tih rhaltawt long khaw amah cunghang te dongah tawt uh.
15:23 Buh hamla amah poeng tih a kut ah hmaisuep khohnin bangla a tawn te metlam a ming eh?
15:24 Anih te rhal loh a let sak tih caem dongah a coekcoe la aka om manghai bangla khobing loh anih te a khulae.
15:25 Pathen taengah a kut a thueng tih Tlungthang taengah phuel uh.
15:26 A rhawn kah uen a thah la a taengah a photling a yong puei.
15:27 A maelhmai te a tha neh a khuk tih a uen duela bungkawt laep.
15:28 Tedae khopuei khosa khaw a im ding te lungkuk la a phaek uh tih a khuiah khosa uh pawh.
15:29 Boei pawt vetih a thadueng khaw pai mahpawh. Amih kah khohrhang loh diklai ah pungtai mahpawh.
15:30 Hmaisuep lamloh nong thai mahpawh. A dawn te hmairhong loh a hae vetih a ka dongkah yilh loh a khoe ni.
15:31 A poeyoek dongah tangnah boel saeh lamtah a poeyoek dongah khohmang boel saeh. A hnothung khaw a poeyoek lamni a om eh.
15:32 A khohnin loh cup pawt vetih a rhophoe khaw hing mahpawh.
15:33 Misur a thaihkang bangla hul vetih olive rhaipai bangla rhul ni.
15:34 Lailak kah hlangboel tah pumhong la om vetih kapbaih kah dap tah hmai loh a hlawp ni.
15:35 thakthaenah la vawn tih boethae a sak. A bungko khaw hlangthai palat cuen,” a ti nah.