Library · hlt

Job 17

17:1 Ka mueihla he pat tih ka khohnin loh khum coeng, kai hamla coeng tih phuel om coeng. 17:2 Ka taengah a omsasaipat pai moenih a? Te dongah amih koek ham khaw ka mik ah rhaeh pai saeh. 17:3 Kai kah rhikhang he namah hamla khueh laeh. Anih te ulong ka kut dongla a khoom eh? 17:4 Amih kah lungbuei te lungmingnah lamloh na khoem pah coeng. Te dongah na pomsang sak mahpawh. 17:5 Khoyo la a hui a phoe vaengah a ca rhoek mik tah hma coeng. 17:6 Kai he pilnam kah a thuidoek la n'khueh tih maelhmai dongkah timthoeihnah la ka om. 17:7 Ka mik he konoinah neh hmang coeng tih ka pumrho he khokhawn bangla boeih om. 17:8 Te dongah aka thuem khaw a pong sak tih lailak taengah ommongsitoe a haenghang sak. 17:9 Tedae aka dueng loh amah longpuei te a tuuk vetih a kut cim khaw a thaa sai ni. 17:10 Amih te boeih na mael sak uh coeng. Na pawk uh to cakhaw nangmih ah hlangcueih ka hmu mahpawh. 17:11 Ka khohnin loh thok coeng. Ka thinko kah kohnek la ka poeknah mawth coeng. 17:12 Khoyin te khothaih la a khueh tih, a hmuep tom te vangnah neh a yoei sak. 17:13 Saelkhui te ka im bangla ka lamtawn tih, hmaisuep ah ka rhaenghmuen ka saelh. 17:14 Vaam taengah, “A pa nang,” ka ti nah tih a rhit taengah, “A nu neh ka ngannu,” ka ti nah coeng. 17:15 Te dongah menim ka ngaiuepnah tih ka ngaiuepnah he unim aka mae? 17:16 Saelkhui thohka te suntla vetih laipi khuila rhenten n'ael aya?,” a ti.