Job 18
18:1 Shuhi Bildad loh a doo tih,
18:2 “Olthui kah taikhaihnah te me hil nim na khueh ve. Yakming lamtah a hnukah thui sih.
18:3 Balae tih rhamsa bangla nan poek, na mikhmuh ah ka angvawk a?
18:4 A thintoek ah amah hinglu pataeng a baeh ta. Diklai loh a hnoo tih lungpang te a hmuen lamloh a thoeih akhaw nang hut a?
18:5 Halang rhoek kah vangnah ngawn tah thi tih a hmai te hmaihli bang lam pataeng aa pawh.
18:6 Vangnah khaw a dap khuiah hmuep tih a hmaithoi khaw amah taengah a thih pah.
18:7 A thahuem kah khokan pataeng caek tih a cilsuep loh amah a voeih.
18:8 A kho loh lawk khuila a tueih tih sahamlong khuila a pongpa sak.
18:9 A khodil te pael loh a tuuk tih amah te kokthah dongah man.
18:10 A rhuihet te diklai dongah a tung tih, a sutaeh te a hawn ah a khueh pah.
18:11 Anih te mueirhih loh a kaepvai ah a let sak tih a kho ah taekyak uh.
18:12 A boethae ah bungpong la om tih a cungdonah hamla rhainah khaw a sikim pah.
18:13 Dueknah caming loh a vin saa a caak pah tih a rhuhrhong a hnom pah.
18:14 A pangtungnah a dap lamloh a poh tih mueirhih manghai taengla a luei sak.
18:15 Amah kah pawt long khaw anih kah dap ah kho a sak tih, a tolkhoeng te yam a phul thil.
18:16 A yung khui ah koh tih a so duela a pae khaw ngat.
18:17 Anih poekkoepnah te diklai lamloh paltham tih a ming te rhamvoel hmai ah om pawh.
18:18 Anih te vangnah lamloh a hmuep la a thaek uh tih anih te lunglai lamloh a poeng sak uh.
18:19 A taengah a ca tal tih a pilnam taengah a cadil om pawh. A lampahnah ah khaw rhaengnaeng om pawh.
18:20 Amah tue vaengah pong tih a hnuk a hmai la hlithae loh a tuuk.
18:21 He tah boethae kah dungtlungim tih Pathen aka ming pawt kah a hmuen khaw he tlam ni,” a ti nah.