Job 20
20:1 Te phoeiah Naamathi Zophar loh a doo tih,
20:2 “Te dongah ka pomnah kai n'thuung tih kamah khuiah ka tawn uh coeng dongah ni.
20:3 Ka thuituennah he mingthae la ka yaak dongah ka yakmingnah dongah mueihla loh kai n'doo.
20:4 Suen lamloh diklai dongah hlang a khueh parhi te na ming a?
20:5 Halang kah omngaih laa tah yoei tih lailak kah kohoenah khaw mikhaptok hil mai ni.
20:6 A thinlennah te vaan duela cet tih a lu loh khomai duela puet cakhaw,
20:7 a aek bangla a yoeyah la milh vetih anih aka hmu rhoek loh, “Anih ta?” a ti uh ni.
20:8 Mang bangla a ding phoeiah tah anih te hmu uh pawh. Khoyin kah olphong bangla khum hmata.
20:9 A mik loh a hmuh khaw rhaep mahpawh. Anih te amah hmuen ah mae voel mahpawh.
20:10 A ca rhoek loh tattloel rhoek te a moeithen uh tih a kut loh a thahuem te a mael uh.
20:11 A rhuh tah a cacawn rhoek bangla hah uh dae a cacawn rhoek khaw amah neh laipi dongah ni a. yalh eh.
20:12 A ka dongah tui mai cakhaw boethae te a lai hmui ah a thuh.
20:13 Te te a hnaih tih a toeng pawt dongah a ka khui la a ma-uem.
20:14 A bung khuikah a buh te a khui ah minta sue la poeh ni.
20:15 Khuehtawn a dolh vaengah a bung khui lamloh lok vetih anih te Pathen loh a talh ni.
20:16 Minta sue loh a khut vetih rhulthae lai loh amah a ngawn ni.
20:17 Soklong, tuiva neh khorha kah khoitui neh suknaeng te hmuh mahpawh.
20:18 Thatloh phu te a thuung akhaw a hnothung kah thadueng bangla a dolh pawt dongah yoka pawh.
20:19 tattloel te a neet phoeiah amah loh a sak mueh im te a hnoo sak tih a rawth pah.
20:20 A bungko lamkah thayoeituipan te ming pawt tih a nai nen khaw loeih pawh.
20:21 A caak ham caknoi om pawh. Te dongah a thennah poem hae mahpawh.
20:22 A khuehtawn neh a hah vaengah anih te a daengdaeh vetih thakthaekung kah kut boeih te anih soah thoeng ni.
20:23 Anih bung hah sak ham a taengah amah kah thintoek thinsa a tueih pah vetih a buhcak te anih soah a tlan sak.
20:24 Thicung lungpok haica lamloh yong dae anih te rhohum lii loh a kah.
20:25 A yueh vaengah a pumpu lamloh a pawlh pah. Te vaengah a hmuet khui lamkah mueirhih te amah soah rhaek la a caeh pah ni.
20:26 Hmaisuep cungkuem te khoem hamla a tung. A hmuh mueh hmai loh anih te a hlawp vetih a dap kah rhaengnaeng khaw a talh pah ni.
20:27 Anih kathaesainah te vaan loh a hliphen uh vetih diklai loh amah taengah a tai pah ni.
20:28 A thintoeknah hnin ah tah a im kah cangpai khaw a poelyoe pah vetih a hawk pah ni.
20:29 Halang hlang loh tebang khoyo te Pathen taeng lamkah a dang tih Pathen loh a ol rho la a khueh pah,” a ti.