Library · hlt

Job 21

21:1 Te phoeiah Job loh a doo tih tih, 21:2 Ka ol hnatun, hnatun lamtah te te nangmih kah hloephloeinah om saeh. 21:3 Ka thui vaengah kai ol he ueh mai lamtah ka thui hnukah nan tamdaeng akhaw. 21:4 Kai khaw ka kohuetnah he hlang hut a? Balae tih ka mueihla loh a ngen pawt mai eh? 21:5 Kai taengla a mael vaengah hal tih a kut neh a ka te a puei. 21:6 Ka poek bal vaengah ka let tih ka pumsa he tuennah loh a tuuk. 21:7 Halang rhoek tah haimo la a hing uh akhaw balae tih tatthai la a len uh. 21:8 A mikhmuh kah a tiingan rhoek neh a mikhmuh kah a cadil cahma khaw amih taengah a cikngae sak. 21:9 Amih im khaw birhihnah lamloh ngaimongnah la om tih Pathen kah conghol loh amih soah cuk thil pawh. 21:10 A vaito a pil vaengah a vaito a pom khaw tuei pawt tih thangyah tlaih pawh. 21:11 A casenca rhoek te boiva bangla a hlah uh tih a camoe rhoek loh soipet uh. 21:12 Kamrhing neh rhotoeng te a phueih uh tih phavi ol neh a kohoe uh. 21:13 Amamih vaengkah tue then khuiah muei uh tih hmawn uh. Mikhaptok ah saelkhui la ael uh. 21:14 Tedae Pathen taengah, “Kaimih taeng lamloh nong laeh. Na longpuei ming ham ka ngaih uh moenih. 21:15 Anih taengah thothueng ham khaw unim tlungthang? A taengah n'cuuk uh ham khaw balae a hoeikhang eh?” a ti uh. 21:16 Amih kah thennah khaw amamih kut ah om pawt lah ko ke. Halang rhoek kah cilsuep te kai lamloh lakhla saeh. 21:17 Halang rhoek kah hmaithoi tah metlam khaw thi tih amamih kah rhainah amamih soah a thoeng pah. A thintoek neh a rhilong a suem pah. 21:18 Khohli hmai ah cangkong bangla om uh tih cangkik bangla cangpalam loh a khuen. 21:19 Pathen loh a ca rhoek ham a khoem coeng. A boethae te amah taengah thuung saeh lamtah ming saeh. 21:20 A sitlohthamlam te a mik, a mik ah tueng saeh lamtah tlungthang kah kosi te mam sak saeh. 21:21 A hnukah a imkhui ham a kongaih te balae? A hla kah a tarhing khaw bawt coeng. 21:22 Pathen te mingnah a tukkil a? Amah he pomsang tih lai a tloek. 21:23 A cungkuem dongah bidipbisok tih thayoeituipan la amah kah thincaknah rhuhrhong neh aka duek he, 21:24 A rhangsuk khaw suktui buem tih a rhuh hliing khaw sulpuem. 21:25 Hinglu khahing la duek tih hnothen aka ca pawt he khaw, 21:26 laipi khuiah rhenten yalh tih a rhit loh a soah a yol. 21:27 Nangmih kah kopoek ka ming phoeiah tangkhuepnah neh kai soah nan hul ni te. 21:28 “Hlangcong im te menim? Halang tolhmuen kah dap te menim?” na ti uh. 21:29 Longpuei aka poeng rhoek te na dawt uh pawt tih amih kah miknoek khaw na hmat uh pawt nim? 21:30 Rhainah khohnin lamloh boethae te a tuem tih thinpom khohnin lamloh a khuen te ta. 21:31 A khoboe te a mikhmuh ah aka phoe pah te unim? A saii bangla a taengah aka thuung te unim? 21:32 Anih khaw phuel la a khuen vaengah laivuei ni a. hak thil. 21:33 Anih ham soklong kah dikmuh khaw tui. Anih hnuk te hlang boeih loh a thoelh tih anih hmai kah hlangmi tae lek pawh. 21:34 Te dongah balae tih a honghi la kai he nan hloep uh? Nangmih kah taikhaih khaw boekoeknah la cul coeng,” a ti.