Job 22
22:1 Temani Eliphaz loh a doo tih,
22:2 Pathen te hlang loh s hmaiben a? Lungming khaw amah la dawk a hmaiben uh.
22:3 Na tang mai tih na mueluemnah mai akhaw, na khoboe soep cakhaw tlungthang hamla naep aya?
22:4 Na hinyahnah dongah nang te laitloeknah neh n'khuen tih nang n'tluung a ?
22:5 Na boethae tangkik pawt nim ? Nang kah thaesainah te a bawtnah om pawh.
22:6 Lunglilungla la na manuca na laikoi tih pumtling kah himbai te na pit pah.
22:7 Buhmueh rhathih te tui na tul pawt tih bungpong te buh na hloh pah.
22:8 Bantha aka khueh hlang loh amah hamla khohmuen a khueh tih a sokah khosa mikhmuh ah a dangrhoek.
22:9 Nuhmai te kuttling la na tueih tih cadah te a ban na phop pah.
22:10 Na kaepvai kah pael dongah he khaw na birhihnah neh buengrhuet na let.
22:11 A hmuep khaw na hmu pawt tih tuili tui loh nang n'khuk.
22:12 Pathen tah vaan sang kah moenih a ? So lah, aisi rhoek kah a lu tah pomsang uh te.
22:13 Te lalah, “Pathen te metlam a mingpha ? Yinnah lamloh lai a tloek a ?
22:14 Anih te khomai loh a huep tih tueng pawh. Te vaengah vaan kah kueluek dongah cet,” na ti.
22:15 Boethae hlang rhoek loh a cawt khosuen caehlong nim na ngaithuen salah?
22:16 A tonga uh vaengah a tue pawt ah khaw tuiva loh amih kah khoengim te a hawt pah.
22:17 “Pathen te mamih taeng lamloh nong saeh, Tlungthang loh mamih taengah balae a saii eh? ” a ti uh.
22:18 Amah loh amih im te hnothen a cung sak sitoe cakhaw halang kah cilsuep tah kai lamloh lakhla saeh.
22:19 Aka dueng rhoek loh a hmuh vaengah a kohoe uh tih ommongsitoe loh amih te a tamdaeng.
22:20 Mamih kah thinnaeh a thup vetih amih kah a coih te hmai loh hlawp het pawt nim?
22:21 Amah neh hmaiben lamtah te nen te thuung laeh. Nang taengah hnothen ha pawk bitni.
22:22 A ka lamkah olkhueng mah doe laeh, a ol te khaw na thinko khuiah khueh laeh.
22:23 Tlungthang taengla na mael atah n'thoh bitni dumlai mah na dap lamloh lakhla sak.
22:24 Pasing te laipi bangla, Ophir te soklong kah lungpang bangla khueh ngawn.
22:25 Te vaengah na pasing te tlungthang la, cak te na ki la poeh bitni.
22:26 Te daengah ni Tlungthang dongah na ngailaem vetih Pathen taengla na maelhmai na dangrhoek bitni.
22:27 A taengah na thangthui vaengah nang ol a yaak vetih na olcaeng khaw cung ni.
22:28 Olkhueh te na tuiphih vaengah nang hamla thoo vetih na longpuei ah vangnah loh a tue ni.
22:29 A kunyun uh vaengah koevoeinah na thui dae tlahoei mik ni a khang eh.
22:30 Ommongsitoe pawt khaw loeih vetih na kut kah cimcaihnah loh a loeih sak ni,” a ti.