Library · hlt

Job 29

29:1 Job loh amah kah a pom te a cong tih, 29:2 “Kai he hlamat kah hla bangla aka khueh tih Pathen kah khohnin bangla kai aka tuem te unim? 29:3 Amah loh a hmaithoi te ka lu soah a thangthen tih amah kah vangnah nen ni a. hmuep ah khaw ka caeh. 29:4 Ka cavaa tue vaengah khaw ka dap ah Pathen kah baecenol la ka om. 29:5 Tlungthang te kai taengah om pueng tih, ka kaepvai ka ca rhoek om. 29:6 Ka khokan te suknaeng neh a hluk tih lungpang loh kai ham situi sokca a long sak. 29:7 Vangpuei vongka ah ka thoeng tih toltung ah ka ngolhmuen cikngae sak. 29:8 Kai m'hmuh uh vaengah cadong rhoek te thuh uh. Patong rhoek khaw thoo uh tih pai uh. 29:9 Mangpa rhoek loh olthui te a phah uh tih a kut te a ka dongla a khueh uh. 29:10 Rhaengsang rhoek ol te a phah tih a lai khaw a dang dongla kap. 29:11 Hna loh a yaak vaengah kai n'uem tih mik loh a hmuh vaengah kai n'rhalrhing sak. 29:12 Mangdaeng loh bomnah a bih tih cadah neh a taengah aka bom aka om pawt khaw ka loeih sak. 29:13 Hlang milh kah yoethennah te kai soah pai tih nuhmai kah lungbuei khaw ka tamhoe sak. 29:14 Duengnah te ka bai tih hnikul bangla kai n'khuk. Ka tiktamnah he ka sammuei nah ni. 29:15 Mikdael taengah mik la, khokhaem taengah kho la ka om. 29:16 Kai tah khodaeng taengah a napa la ka om tih ming pawt kah tuituknah te ka khe pah. 29:17 Boethae kah pumcu te ka thuk pah tih a no lamkah maeh te ka voeih pah. 29:18 Te dongah, “Ka bu ah ka pal mako,” ka ti tih laivin bangla khohnin ka puh. 29:19 Ka yung loh tui taengla a muk tih buemtui loh ka cangvuei dongah rhaeh. 29:20 Ka thangpomnah ka taengah thai tih ka lii ka kut dongah tinghil. 29:21 Kai taengah a hnatun uh tih a lamtawn uh dongah ka cilsuep ham kuemsuem uh. 29:22 Ka ol hnukah talh uh voel pawt tih kai olthui he amih soah tla. 29:23 Kai ham tah khotlan bangla a lamtawn uh tih a ka loh tlankhol bangla a ang uh. 29:24 Amih taengah ka luem dae n'tangnah uh pawt tih ka maelhmai vangnah dongah khaw yalh uh pawh. 29:25 Amih kah longpuei te ka coelh tih boeilu la ka ngol. Caem lakli ah manghai bangla kho ka sak tih rhahdoe cangpoem akhaw a hloep.