Job 28
28:1 Cak ham a khorhui om tih sui ham khaw a ciil nah hmuen om.
28:2 Thicung khaw laipi lamloh a loh tih lungto te rhohum la a tlae.
28:3 A bawtnah te a hmuep neh a khuetnah a cungkuem hil a khueh. Anih loh lungto te a hmuep neh dueknah hlipkhup ah khaw a hoem.
28:4 Soklong te aka bakuep taeng lamloh a yoe tih kho neh caeh khaw a hnilh uh. Hlanghing lamkah aka tlayae rhoek khaw hinghuen uh.
28:5 Diklai amah lamloh buh thoeng tih a hmui ah hmai bangla om.
28:6 A lungto te minhum hmuen tih a taengah sui laipi om.
28:7 A hawn te vatlung loh ming pawt tih maisi mik loh hmu pawh.
28:8 Te te sa ca rhoek loh cawt pawt tih te donglong te sathuengca long khaw pawn pawh.
28:9 Hmailung soah a kut a hlah tih tlang pataeng a yung ah a phil.
28:10 Sokko lungpang dongah a khoel tih umponah cungkuem khaw a mik loh a hmuh.
28:11 Tuiva tuilong khaw a kueng tih olhuep te khosae la a khuen.
28:12 Tedae me rhoek ah nim cueihnah a hmuh tih yakmingnah hmuen he menim?
28:13 A phu te hlanghing loh ming pawt tih mulhing khohmuen ah a hmuh moenih.
28:14 Tuidung loh, “Te te kai ah moenih,” a ti tih tuitunli loh, “Kai taengah moenih,” a ti.
28:15 Te ham te cui cilh khaw pae thai pawt tih cueihnah a phu te cak khaw a khiing pah.
28:16 Ophir sui nen khaw, oitha lung vang nen khaw minhum nen khawting pawh.
28:17 Te te sui neh canglung neh tluk pawt tih a hnothung he suicilh hnopai bal moenih.
28:18 Maerhuhlung neh disaehlung khaw thui lawk pawt tih cueihnah rhovoep tah lungvang lakah then.
28:19 Te te Kusah vaya nen khaw tluk pawt tih sui cilh nen khaw ting pawh.
28:20 Te dongah cueihnah he me lamkah nim ha pawk tih yakmingnah hmuen he menim?
28:21 Mulhing boeih kah mik lamloh a thuh pah tih vaan kah vaa taeng lamloh a thuh.
28:22 Abaddon neh dueknah loh, “A olthang te kaimih hna neh ka yaak uh,” a ti.
28:23 Pathen loh a longpuei a yakming tih a hmuen te khaw amah loh a ming.
28:24 Amah loh diklai khobawt hil a paelki tih vaan hmui khaw boeih a hmuh.
28:25 Yilh kah a khiing a khueh pah tih tui khaw cungnueh neh a nueh.
28:26 Amah loh khotlan ham rhi a suem tih rhaek ol ham khaw longpuei a khueh.
28:27 Cueihnah te a hmuh tih a tae. Cueihnah te a sikim sak tih a khe bal.
28:28 Hlang taengah khaw, 'Ka Boeipa hinyahnah he cueihnah la om tih boethae lamloh nong he yakmingnah,’ a ti,” a ti nah.