Library · hlt

Job 3

3:1 Te phoeiah Job a ka te a ang tih a khohnin te a tap. 3:2 Te vaengah Job loh a doo tih, 3:3 Amah kah thang nah khohnin neh, “Tongpa a yom,” a ti hlaem khaw paltham mai saeh. 3:4 Te khohnin te a hmuep la om palueng vetih, Pathen loh a so la toem pawt mako. Te dongah vangnah loh te soah sae boel saeh. 3:5 Te te hmaisuep neh dueknah hlipkhup loh suk saeh. A soah khomai yaal saeh lamtah, hlamhop hnin bangla let saeh. 3:6 Tekah hlaem te a hmuep loh lo saeh lamtah kum khat kah khohnin dongah a kohoe boel saeh, hla taenah dongah khaw kun boel saeh. 3:7 Tekah hlaem te pumhong la om saeh lamtah a khuiah omngaih laa cuen boel saeh ne. 3:8 Khohnin thae aka phoei thil tih, a coekcoe la Leviathan aka haeng loh, te te tap saeh. 3:9 Hlaemhmah aisi khaw hmuep saeh lamtah, khosae te lamtawn cakhaw sae boel saeh, mincang khosaeng te hmu boel saeh. 3:10 Ka bungko thohkhaih te a khaih mai vetih thakthaenah he ka mik lamloh a thuh mai kolla. 3:11 Balae tih bung khuiah ka duek pawh. Bungko lamloh ka thoeng tih ka pal hae. 3:12 Balae tih khuklu loh kai n'doe, balae tih rhangsuk loh n'khut. 3:13 Ka yalh to palueng koinih la ka ip mong vetih ka duem lah ni. 3:14 Manghai rhoek neh a imrhong aka thoh diklai olrhoep rhoek taengla, 3:15 Amih taengkah sui mangpa rhoek neh a im ah tangka aka hawn rhoek taengah. 3:16 Rhumpu bangla n'thuh kanoek vetih vangnah aka hmuh noek pawh camoe rhoek bangla ka om pawt mako. 3:17 Teah te halang rhoek loh khoponah a toeng uh tih thadueng aka bawt khaw pahoi duem. 3:18 Thongtla rhoek te rhenten rhalthal uh tih, tueihno ol ya uh pawh. 3:19 Tanoe neh kangham khaw amah la om pahoi tih sal khaw a boei taeng lamloh sayalh coeng. 3:20 Balae tih thakthaekung taengah vangnah, hinglu khahing taengah hingnah a paek? 3:21 Dueknah hamla aka rhingda long khaw dang hae pawt tih kawn lakah te te a too. 3:22 Phuel a hmuh uh vaengah omngaihnah neh a ngaingaih la a kohoe uh. 3:23 A longpuei te hlang ham tah a thuh dae a taengah Pathen loh a mak pah. 3:24 Ka buh hmai ah ka hueinah ha pawk tih ka kawknah he tui bangla pha. 3:25 Birhihnah neh ka birhih akhaw kamah m'vuei tih ka rhih nawn te khaw kamah taengah thoeng. 3:26 Ka dingsuek pawt tih ka mong pawh, ka duem pawt vaengah khoponah ha thoeng,” a ti.