Library · hlt

Job 33

33:1 Job, ka olthui hnatun dae lamtah ka ol boeih he hnakaeng thil laeh. 33:2 Ka ka ong coeng he. Ka ka khuikah ka lai loh a thui. 33:3 Ka ol he ka lungbuei dueng lamkah tih ka hmuilai kah mingnah loh cimphan la a thui. 33:4 Pathen Mueihla loh kai n'saii tih Tlungthang kah hiil loh kai n'hing sak. 33:5 Kai thuung hamla na coeng mak atah tawn uh lamtah ka mikhmuh ah pai laeh. 33:6 Pathen taengah kai he nang ka bangla ka om tih kai khaw dikpo lamkah ni m'pet. 33:7 Kai he mueirhih moenih nang n'let sak mako. Ka kut long khaw nang n'nan thil mahpawh. 33:8 Tedae ka hna ah na thui tih olthui ol khaw ka yaak. 33:9 “Ka cil tih boekoek ka khueh moenih. Ka caih tih kai taengah thaesainah om moenih. 33:10 Te cakhaw kai taengkah noihhainah a hmuh vaengah kai amah kah thunkha bangla a moeh. 33:11 Ka kho he hloong dongah a buen tih ka caehlong boeih a dawn,” na ti. 33:12 Tedae na tang moenih he. Pathen he hlanghing lakah a len dongah nang te kan doo. 33:13 Balae tih amah te na ho. A ol te boeih n'doo moenih ta. 33:14 Pathen loh pakhat la a thui dae a hmuhming pawt atah hnavoei la a thui. 33:15 Ih loh hlang a hnah vaengkah khoyin olphong mueimang ah khaw, thingkong dongkah a ngam vaengah khaw, 33:16 Hlang hna te a khui sak tih amih kah rhalrhingnah neh a daeng pah. 33:17 Hlang loh a khoboe lamkah a nong sak tih hlang lamkah koevoeinah a khuk pah. 33:18 A hinglu te vaam khui lamloh, a hingnah te pumcumnah loh a paan khui lamkah a hoeptlang. 33:19 A thingkong dongah nganboh neh a tluung tih tuituknah loh a rhuhrhong boeih te phat a thuek pah. 33:20 A hingnah loh buh te khaw a hinglu loh hoehhamnah maeh khaw a lawt pah. 33:21 A saa te caphoei cuk bangla mueihmuh ah a khah tih a rhuh a hmuh pawt khaw a ming sak. 33:22 A hinglu loh vaam khuila, a hingnah te aka duek rhoek taengla pawk. 33:23 Anih kah duengnah te hlang taengah aka puen la thawngkhat lamkah pakhat ngawn tah amah taengah puencawn oldoe om khaming. 33:24 Te dongah anih te a rhen mai vetih, 'Tlansum ka dang tih hlan kah aka suntla khui lamloh anih he doek laeh,’ ti mai koinih. 33:25 A saa te camoe bangla noe vetih a cacawn tue vaengkah bangla saibawn suidae. 33:26 Pathen taengah a thangthui vanbangla anih te a moeithen ta. A maelhmai te tamlung neh a hmuh vaengah tah anih te hlanghing taengah duengnah neh a mael sak. 33:27 Hlang rhoek taengla a mae tih, “Ka tholh tih a thuem te a paihaeh sak dae kai taengah n'yook sak moenih. 33:28 Kamah hinglu, hinglu van tah hlan a paan khui lamloh a lat. Te dongah ka hingnah neh a hingnah loh vangnah te hmu saeh. 33:29 He boeih he Pathen loh hlang taengah voei nit voei thum a saii ne. 33:30 Hlan khui lamkah a hinglu te hingnah khosae neh tue hamla a mael sak. 33:31 Job nang hnatung lamtah kai ol he hnatun. Hilphah lamtah kai loh kan thui eh. 33:32 Kai nan thuung ham ol a om atah thui lah. Nang tang sak ham ka ngaih dongah ni. 33:33 Kai taengkah he na hnatun pawt atah hilphah lamtah nang te cueihnah kan cang sak bitni,” a ti nah.