Library · hlt

Job 34

34:1 Elihu loh koep a doo tih, 34:2 Aka cueih rhoek ka ol hnatun uh lamtah aka ming rhoek loh kai taengla hnakaeng uh. 34:3 Hna loh olthui a nuemnai tih lai loh caak te a ten. 34:4 Tiktamnah te mamih ham coelh uh sih lamtah a then te mamih lakli ah ming uh sih. 34:5 Job loh,'Ka tang lalah Pathen loh ka tiktamnah a hnawt. 34:6 Ka tiktamnah khaw ka laithae bang mai la boekoeknah pawt mai ah ka thaltang loh rhawp coeng,’ a ti. 34:7 Tui bangla tamdaengnah aka o Job bang hlang he om nim. 34:8 Boethae aka saii neh rhoihui bangla yiin tih halang hlang rhoek taengah khaw pongpa. 34:9 'Pathen taengah a ngaingaih vaengah hlang hmaiben pawh,’ a ti. 34:10 Te dongah thinko aka khueh hlang rhoek loh kai taengah hnatun uh. Halangnah he Pathen lamloh savisava tih Tlungthang he dumlai neh savisava coeng. 34:11 Hlang kah bisai he amah taengla a thuung tih hlang a caehlong bangla amah loh a hmuh. 34:12 Pathen tah boe tueng pawt tih Tlungthang loh tiktamnah te a khun sak moenih. 34:13 Amah loh diklai ah unim a khueh tih lunglai he a pum la u taengah nim a tloeng. 34:14 Amah taengkah loh a khueh a lungbuei, a mueihla neh a hiil te amah taengla khoem koinih, 34:15 Pumsa boeih he rhenten pal vetih hlang he laipi la mael ni. 34:16 Yakmingnah a om atah he he hnatun lamtah ka olthui ol he hnakaeng lah. 34:17 Tiktamnah aka thiinah aisat loh a ngoldoelh tih aka dueng khuet loh m'boe sak aya? 34:18 Manghai te,'hlang muen,’ hlangcong te 'Halang,’ a ti nah nim? 34:19 Amah loh mangpa maelhmai dan pawt tih tattloel maelhmai lakah rhoeikhang kah a hmat tloe moenih. Amih boeih te amah kut dongah kutngo ni. 34:20 Mikhaptok ah a duek dongah pilnam khoyin pathung ah tuen tih khum uh. Kut nen pawt akhaw aka lueng a khoe uh. 34:21 A mik te hlang kah longpuei dongah a khueh tih a khokan boeih te a hmuh. 34:22 Boethae aka saii rhoek thuh hamla hmaisuep om pawt tih dueknah hlipkhup khaw a om moenih. 34:23 Pathen taengkah laitloeknah dongla a pha ham coeng dongah hlang te koep a cae moenih. 34:24 Aka khuet khenah a om pawt ah a phaek tih amih yueng la a tloe a khueh. 34:25 Amih kah khoboe te a hmat dongah khoyin ah a maelh tih pop uh. 34:26 Halang rhoek ham tah hmuh nah hmuen ah amih te kut a paeng thil. 34:27 Te dongah ni a hnuk lamloh nong uh tangloeng tih a longpuei boeih te cangbam uh pawh. 34:28 tattloel kah pangngawlnah te a taengla pawk tih mangdaeng kah pangngawlnah a yaak. 34:29 Tedae amah te mong tih ulong a boe sak. Maelhmai a thuh vaengah ulong anih a mae? Tedae namtom so neh hlang khat soah khaw rhenten om ta. 34:30 Lailak hlang a manghai khaw pilnam ham hlaeh la poeh. 34:31 Pathen taengah tah,'Ka laikoi pawt khaw ka phueih. 34:32 Nang kam hmuh pawt ah kai nan thuinuet coeng. Dumlai ka saii mai cakhaw ka koei voel boel eh?,’ a ti nama thui coeng. 34:33 Na hnawt coeng dongah te kah te namah taeng lamloh na thuung aya? Namah loh na coelh coeng, kai long moenih. Te dongah na ming te thui to. 34:34 Thinko aka khueh hlang rhoek loh kai taengah thui uh lamtah hlang cueih loh kai taengkah he hnatun saeh. 34:35 Job he mingnah neh cal pawt tih a ol long a cangbam moenih. 34:36 A pa nae, boethae hlang kah taikhaih dongah Job loh a yoeyah la loepdak saeh. 34:37 A tholhnah te mamih laklo ah boekoek neh a koei uh tih kut a paeng dongah Pathen taengah a ol pung,” a ti.