Job 38
38:1 BOEIPA loh Job te hlipuei khui lamloh a doo tih,
38:2 Mingnah aka tal olthui neh cilsuep aka hmuep sak te unim?
38:3 Hlang bangla na pumpu yen lamtah nang kan dawt bangla kai he n'tueng laeh.
38:4 Diklai ka suen vaengah melam na om? Yakmingnah na ming atah thui lah.
38:5 U loh a khodang a khueh khaw na ming van nim? A soah rhilam aka yueng khaw unim?
38:6 A buenhol te me dongah nim a buen tih, a bangkil lung te unim aka thuinuet?
38:7 Mincang aisi rhoek rhenten tamhoe uh tih Pathen ca rhoek boeih yuhui uh.
38:8 Tuitunli te a bung lamloh a poh tih a coe vaengah thohkhaih neh a tlaeng.
38:9 Kai loh cingmai kah a pueinak neh anih kah yinnah hni khaw ka khueh pah.
38:10 Ka oltlueh he anih ham ka tlueh pah tih thohkalh neh thohkhaih khaw ka khueh pah.
38:11 He hil ka ti vaengah ha mop lamtah koei boeh. Na hoemdamnah tuiphu te he ah he khueh laeh.
38:12 Namah tue vaengah mincang ke na uen a? Khothaih ke na ming tih amah hmuen ah khothaih a om khaw na ming.
38:13 Te lamkah halang rhoek khoek ham neh diklai hmoi a tuuk sak ham khaw.
38:14 Dikpo kutbuen bangla poehlip tih pueinak bangla pai.
38:15 Halang rhoek te amamih kah vangnah a hloh pah tih ban a thueng khaw a tlawt sak.
38:16 Tuitunli kah tuiput la na pawk tih tuidung kah khenah dongah na pongpa vai a?
38:17 Nang taengah dueknah vongka rhoek ah uh tih dueknah hlipkhup vongka te na hmuh a?
38:18 Diklai hmuenka duela na yakming nim? A cungkuem la na ming atah thui lah.
38:19 Vangnah aka om longpuei he menim? Hmaisuep kah a hmuen he melae?
38:20 Te te amah khorhi la na thak van tih a im kah a hawn khaw na yakming van nim?
38:21 Nang n'sak tih na khohnin kah a tarhing a puh daengah ni na ming pueng.
38:22 Vuelsong thakvoh khuila na kun tih rhaelnu thakvoh na hmuh a?
38:23 Te te rhal tue vaengkah ham khaw, caemrhal neh caemtloek tue vaengkah ham khaw ka tuem pueng.
38:24 Diklai ah kanghawn loh a taekyak tih, vangnah loh a tael longpuei te menim?
38:25 Tuilong lungpook ham neh rhaek ol ham longpuei aka tael te unim?
38:26 A khuiah tongpa aka om pawh khosoek neh hlang aka tal khohmuen ah khaw rhotui aka tlan sak la,
38:27 khohli rhamrhael neh imrhong aka hah sak la, toitlim annoe aka poe sak la om coeng.
38:28 Khotlan te a napa om a? Buemtui tuicip te ulong a sak?
38:29 Rhaelnu he u kah bungko lamkah nim a thoeng tih, vaan vueltling te ulong a sak?
38:30 Tui khaw lungto bangla thuh uh tih tuidung hman ah khal.
38:31 Airhitbom kah omngaih omloe te na hlaengtang tih buhol phueihrhui khaw na hlawt thai aya?
38:32 Mazzaroth aisi te amah tue vaengah na thoeng sak tih Ayish aisi te a ca rhoek neh na mawt a?
38:33 Vaan kah khosing te na ming atah amah kah laithuithainah te diklai ah na khueh a?
38:34 Na ol te khomai dongla na huel thai tih tuili tui te na khuk thai a?
38:35 Rhaek na tueih vaengah cet uh tih nang taengah, “Kaimih la he,” a ti uh a?
38:36 Kodang khuila cueihnah aka khueh te unim? Kopoek khuiah yakmingnah aka pae te unim?
38:37 Cueihnah neh khomong aka tae te unim? Vaan tuitang aka thael te unim?
38:38 Me vaengah lae Laipi a hlawn la a hlom tih dikmuh a man sak?
38:39 sathuengnu hamla maeh na mae pah tih sathuengca kah hingnah na tom pah a?
38:40 Me vaengah lae a khuisaek ah a ngam uh tih thingpuep khui ah a kol uh?
38:41 A sakah te vangak ham aka tawn pah te unim? A camoe, a camoe uh vaengah tah Pathen taengah bomnah a bih uh dae caak mueh la kho a hmang uh.