Library · hlt

Job 39

39:1 Thaelpang kah sathai a piil tue na ming tih sayuk a rhai na dawn a? 39:2 Hla a cup la na tae tih a piil tue na ming a? 39:3 A ca rhoek loh a koisu uh tih a huel daengah a bungtloh loh a hlah. 39:4 A ca a man uh te cangpai neh rhoeng tih a caeh uh phoeiah tah amih taengla mael uh pawh. 39:5 Sayalh la kohong marhang aka hlah te unim? Laak lueng kah kuelrhui aka hlam te unim? 39:6 A im te kolken la, a dungtlungim te lungkaehlai la ka khueh. 39:7 Khorha kah hlangping te a lawn tih aka tueihno kah pang ol hnatun pawh. 39:8 A luemnah tlang te a cawt tih sulhing boeih te a yoep. 39:9 Cung loh nang taengah a thohtat hamla a huem vetih na kongduk dongah rhaeh aya? 39:10 Cung te a rhuivaeh kong ah na pael vetih nang hnukah tuikol te a thoe aya? 39:11 A thadueng a len dongah a soah na pangtung vetih na thaphu te a taengah na hnoo aya? 39:12 Na cangti te a khuen, a khuen vetih na cangtilhmuen a coi ni tila te te na tangnah a? 39:13 Kalaukva kah phae loh yoka cakhaw bungrho phaemul neh a dii aih nim. 39:14 A duei te diklai dongah a hnoo tih laipi khuiah a awp. 39:15 A kho loh a hep te a hnilh tih kohong mulhing long khaw te te a til. 39:16 A ca rhoek te amah kah pawt bangla a hit sak tih a poeyoek la a thaphu te birhihnah pawh. 39:17 Pathen loh anih te cueihnah a hnilh sak tih a taengah yakmingnah tael pah pawh. 39:18 Hmuensang la a phuel uh tue vaegah tah marhang neh a sokah aka ngol te a nueih thil. 39:19 Marhang taengah thayung thamal na paek a? A rhawn te a hnoo neh na thing pah a? 39:20 Anih te kaisih bangla na pet sak a? A phit vaengkah mueithennah khaw mueirhih la poeh. 39:21 Tuikol te a phuet uh vaengah thadueng neh a ngaingaih lungpok haica doe hamla pawk. 39:22 Rhihnah te a nueih thil tih a rhihyawp pawt dongah cunghang ha lamloh a mael moenih. 39:23 A taengah liva a khoek tih caai neh soe kaw hmaihluei la om. 39:24 Hinghuen neh khoponah neh diklai a coih tih tuki ol te tangnah pawh. 39:25 Tuki te a rhoeh la, “Ahuei,” a ti nah tih caemtloek vaengkah mangpa khohum neh tamlung te a hla lamloh a huep. 39:26 Nang kah yakmingnah dongah nim mutlo loh a phae a phuel tih a ding, a phae te tuithim la a phuel? 39:27 Nang kah ka dongah atha te sang hang tih a bu a pomsang a? 39:28 Thaelpang ah kho a sak tih thaelpang hmuisum neh rhalvong ah khaw rhaeh ta. 39:29 Te lamloh caak a thaih tih a hla lamkah te a mik loh a paelki. 39:30 Te vaengah a vapuel, a vapuel loh thii a caep uh tih rhok om nah ah hnap om,” a ti nah.