Job 41
41:1 Leviathan te vaih neh na doek tih rhui neh a lai na yueh pah thai a?
41:2 A hnarhong ah canghlong na hen thai tih mutlo hling neh a kam na toeh a?
41:3 Nang ham tah huithuinah loh puh vetih nang taengah a mongkawt la cal mai aya?
41:4 Nang taengah paipi a saii vetih anih te kumhal kah sal la na loh aya?
41:5 Anih te vaa bangla na luem puei vetih anih te na hula hamla na khih pa aya?
41:6 Anih ham te thimpom rhoek tael uh thae vetih Kanaan laklo ah a paekboe uh aya?
41:7 A vin dongah palaphae neh, a lu dongah nga khohcung neh na bae sak thai a?
41:8 Anih soah na kut tloeng lamtah poek laeh. Caemtloeknah khaw na koei voel mahpawh.
41:9 A ngaiuepnah khaw a laithae ni te. A mueimae mah a hut tang aya?
41:10 Anih a haeng ham khaw a muen aih bal moenih. Te dongah ka mikhmuh ah aka pai thai te unim?
41:11 Kai n'doe bangla unim ka thuung eh? Vaan hmui kah boeih te kamah kah ni.
41:12 Amah ham bueng pawt tih a olsai neh thayung thamal ol khaw, a phu dongkah a sakthen khaw ka phah ni.
41:13 A pueinak te a hmai la ulong poelyoe pah. Kamrhui rhaepnit neh anih te ulong a paan?
41:14 A maelhmai kah thohkhaih te ulong a ong eh? A no khaw mueirhih la pin om.
41:15 A lip photling a hoemnah khaw kutbuen neh a caek la a khaih.
41:16 Khat te khat taengla tawn uh tih a laklo ah yilh khaw hue pawh.
41:17 Hlang he a manuca taengah balak tih a tuuk uh daengah ni a. pam uh pawh.
41:18 A ikthi loh vangnah a thangthen tih a mik khaw mincang khosaeng banghui ni.
41:19 A ka lamkah hmaithoi thoeng tih hmai hli coe.
41:20 A hnarhong lamkah hmaikhu khaw voh neh canghlong a yawn bangla thoeng.
41:21 A hinglu loh hmai-alh a tak sak tih a ka lamloh hmaihluei thoeng.
41:22 A rhawn ah a sarhi naeh tih a mikhmuh ah rhihnah loh malawk.
41:23 A saa laep te a pum dongah malh kap tih khok pawh.
41:24 A lungbuei te lungto bangla ning tih a dangkah phaklung bangla ning.
41:25 A boeimang vaengah tah tholh pocinah khui lamloh Pathen taengah bakuep uh.
41:26 Anih aka kae cunghang neh caai khaw, lungsong neh caempho khaw a thoh moenih.
41:27 Thi te cangkong bangla, rhohum khaw keet thing bangla a poek.
41:28 Liva capa loh anih a yong sak moenih. Payai lungto pataeng anih taengah tah divawt la poeh.
41:29 Caemboh te divawt bangla a poek tih soe kah hinghuennah te a nueih thil.
41:30 A hmui ah paikaek paihat la om dae tangnong soah sui a hnil.
41:31 A laedil te am bangla a tlawk sak tih tuitunli te anhoi bangla a khueh.
41:32 A hnukah a hawn a phi sak tih tuidung khaw sampok bangla a poek.
41:33 Paepnah om kolla a saii dongah laipi dongah anih aka tluk a om moenih.
41:34 Aka sang boeih te a hmuh. Amah tah hlang oek koca boeih sokah manghai ni,” a ti nah.