Library · hlt

Numbers 1

1:1 Egypt kho lamloh a coe phoeikah a kum bae, a hla bae hnin khat vaengah, Sinai khosoek kah tingtunnah dap ah BOEIPA loh Moses te a voek tih, 1:2 “Israel ca rhaengpuei boeih hlangmi te amah huiko neh, a napa imkhui ah tongpa boeih kah ming tarhing neh a hlangmi te lo laeh. 1:3 Kum kul ca lamloh a so, Israel khuikah caempuei la aka cet boeih te namah neh Aaron loh amah caempuei dong lamloh amih te cawh rhoi laeh. 1:4 Amah a napa imkhui kah a lu hlang te koca pakhat lamloh hlang pakhat tah nangmih rhoi taengah om saeh. 1:5 Te dongah he kah hlang ming aka om rhoek loh nangmih rhoi te m'pai puei saeh. Reuben ham Shedeur capa Elizur, 1:6 Simeon ham te Zurishaddai capa Shelumiel, 1:7 Judah ah Amminadab capa Nahshon, 1:8 Issakhar ah Zuar capa Nethanel, 1:9 Zebulun ah Helon capa Eliab, 1:10 Joseph koca ah Ephraim kah Ammihud capa Elishama neh Manasseh kah Pedahzur capa Gamaliel, 1:11 Benjamin ah Gideoni capa Abidan, 1:12 Dan ah Ammishaddai capa Ahiezer, 1:13 Asher ah Okran capa Pagiel, 1:14 Gad ah Deuel capa Eliasaph, 1:15 Naphtali ah Enan capa Ahira Enan saeh,” a ti nah. 1:16 He mingthang rhoek he rhaengpuei loh a napa rhoek koca kah khoboei neh Israel thawngkhat kah a lu la a khue uh. 1:17 Te phoeiah ming a phoei hlang rhoek te Moses neh Aaron loh a loh. 1:18 A hla bae kah hnin at ah tah rhaengpuei boeih te a tingtun sak. Te vaengah kum kul ca neh a so hang tah a hlangmi la amah huiko neh a napa rhoek imko tarhing la ming a khueh uh. 1:19 BOEIPA loh Moses a uen bangla amih te Sinai khosoek ah a soep. 1:20 Te vaengah Israel caming, Reuben koca kah a rhuirhong tah, a napa imkhui kah a huiko khaw, a hlangmi ming tarhing ah tongpa ca kum kul lamloh a so hang boeih neh caempuei la aka cet boeih te a tae uh. 1:21 Amih Reuben koca te thawng sawmli thawng rhuk neh ya nga la a soep. 1:22 Simeon koca kah a rhuirhong tah, a napa imkhui kah a huiko khaw, a hlangmi ming tarhing ah tongpa ca kum kul lamloh a so hang boeih neh caempuei la aka cet boeih te a soep uh. 1:23 Amih Simeon koca te thawng sawmnga thawng ko neh ya thum la a soep. 1:24 Gad koca kah a rhuirhong tah, a napa imkhui kah a huiko khaw, a ming tarhing ah kum kul ca lamloh a so hang neh caempuei la aka cet boeih te a tae uh. 1:25 Amih Gad koca te thawng sawmli thawng nga neh ya rhuk sawmnga la a soep uh. 1:26 Judah koca kah a rhuirhong te, a napa imkhui kah a huiko khaw, a ming tarhing ah kum kul ca lamloh a so hang neh caempuei la aka cet boeih te a tae uh. 1:27 Amih Judah koca te thawng sawmrhih thawng li neh ya rhuk la a soep uh. 1:28 Issakhar koca kah a rhuirhong te, a napa imkhui kah a huiko khaw, a ming tarhing ah kum kul ca lamloh a so hang neh caempuei la aka cet boeih khaw, 1:29 Amih Issakhar koca te thawng sawmnga thawng li neh ya li la a soep uh. 1:30 Zebulun koca kah a rhuirhong te, a napa imkhui kah a huiko khaw, a ming tarhing ah kum kul ca lamloh a so hang neh caempuei la aka cet boeih khaw, 1:31 Amih Zebulun koca te thawng sawmnga thawng rhih neh ya li la a soep uh. 1:32 Joseph koca ah Ephraim koca kah a rhuirhong te, a napa imkhui kah a huiko khaw, a ming tarhing ah kum kul ca lamloh a so hang neh caempuei la aka cet boeih khaw, 1:33 Amih Ephraim koca te thawng sawmli neh ya nga la a soep uh. 1:34 Manasseh koca kah a rhuirhong te, a napa imkhui kah a huiko khaw, a ming tarhing ah kum kul ca lamloh a so hang neh caempuei la aka cet boeih khaw, 1:35 Amih Manasseh koca te thawng sawmthum thawng hnih yahnih la a soep uh. 1:36 Benjamin koca kah a rhuirhong te, a napa imkhui kah a huiko dongkah, a ming tarhing ah kum kul ca lamloh a so hang neh caempuei la aka cet boeih khaw, 1:37 amih Benjamin koca te thawng sawmthum thawng nga ya li la a soep uh. 1:38 Dan koca kah a rhuirhong te, a napa imkhui kah a huiko dongkah, a ming tarhing ah kum kul ca lamloh a so hang neh caempuei la aka cet boeih khaw, 1:39 amih Dan koca te thawng sawmrhuk thawng hnih neh ya rhih la a soep uh. 1:40 Asher koca kah a rhuirhong te, a napa imkhui kah a huiko khaw, a ming tarhing ah kum kul ca lamloh a so hang neh caempuei la aka cet boeih khaw, 1:41 amih Asher koca te thawng sawmli thawng khat neh ya nga la a soep uh. 1:42 Naphtali koca kah a rhuirhong te, a napa rhoek imkhui kah a huiko khaw, a ming tarhing ah kum kul ca lamloh a so hang neh caempuei la aka cet boeih khaw, 1:43 amih Naphtali koca te thawng sawmnga thawng thum neh ya li la a soep uh. 1:44 He he aka soep rhoek loh a soep vaengah Moses neh Aaron khaw, Israel khoboei hlang hlai nit neh a napa rhoek imkhui pakhat lamkah hlang pakhat rhip om uh. 1:45 Te dongah ni Israel ca rhoek loh a napa rhoek kah imkhui pakhat ah kum kul ca lamloh a so hang, Israel khuiah caempuei la aka cet boeih tah a soep la boeih om uh. 1:46 Te vaengkah a soep boeih te thawng ya rhuk neh thawng thum neh ya nga neh sawmnga lo uh. 1:47 Tedae Levi te tah a napa koca lamloh amih lakli ah ana soep uh thil pawh. 1:48 BOEIPA loh Moses te a voek tih, 1:49 “Levi koca bueng tah soep thil boel lamtah amih khuikah a lu te Israel ca khui la khuen boeh. 1:50 Tedae namah loh Levi te laipainah dungtlungim so neh a hnopai cungkuem so neh a taengkah a cungkuem soah khueh. Amih loh dungtlungim neh a hnopai boeih te kawt uh saeh. Amih te thotat uh saeh lamtah dungtlungim taengah pin rhaeh uh saeh. 1:51 Dungtlungim te khuen ham vaengah te te Levi rhoek loh suntlak puei saeh. Dungtlungim a rhaeh ham vaengah khaw te te Levi rhoek loh thoh uh saeh. Tedae hlangthawt loh a paan atah duek saeh. 1:52 Israel ca khuikah hlang he amah kah rhaehhmuen ah rhaeh saeh lamtah hlang he amah caempuei kah a hnitai neh om saeh. 1:53 Te vaengah Levi rhoek tah laipainah dungtlungim kaepah rhaeh uh saeh. Te daengah ni thinhulnah loh Israel ca rhaengpuei soah a tlak pawt eh. Te dongah laipainah dungtlungim kah tuemkoi te Levi rhoek loh ngaithuen uh saeh. 1:54 Israel ca rhoek loh a saii uh vaengah BOEIPA loh Moses a uen bangla a cungkuem te a saii uh.