Library · hlt

Numbers 2

2:1 BOEIPA loh Moses neh Aaron te a voek tih, 2:2 “Hlang he a napa imko kah miknoek neh a hnitai hmuiah rhaeh uh saeh. Israel ca rhoek te tingtunnah dap taengah a hla la pin rhaeh uh saeh. 2:3 Khothoeng khocuk la Judah lambong kah hnitai te amah kah caempuei neh rhaeh saeh. Te vaengah Amminadab capa Nahshon te Judah koca rhoek kah khoboei saeh. 2:4 A caempuei khaw thawng sawmrhih thawng li neh ya rhuk la a soep. 2:5 A hmatoeng ah aka rhaeh Issakhar koca neh Issakhar ca rhoek kah khoboei tah Zuar capa Nethanel saeh. 2:6 A caempuei khaw thawng sawmnga thawng li neh ya li la soep saeh. 2:7 Zebulun koca neh Zebulun ca rhoek kah khoboei tah Helon capa Eliab saeh. 2:8 A caempuei khaw thawng sawmnga thawng rhih neh ya li la a soep uh. 2:9 Judah rhaehhmuen kah boeih te thawng yakhat neh thawng sawmrhet neh thawng rhuk ya li la soep uh. Amih kah caempuei te a pacuek ah cet saeh. 2:10 Reuben rhaehhmuen kah hnitai tah tuithim ah amah caempuei neh om tih Shedeur capa Elizur te Reuben koca kah khoboei saeh. 2:11 A caempuei neh anih te thawng sawmli thawng rhuk neh ya nga la soep uh. 2:12 A hmatoeng ah aka rhaeh Simeon koca neh Simeon ca rhoek kah khoboei tah Zurishaddai capa Shelumiel saeh. 2:13 A caempuei neh amih te thawng sawmnga thawng ko neh ya thum la soep saeh. 2:14 Gad koca neh Gad ca rhoek kah khoboei tah Reuel capa Eliasaph saeh. 2:15 A caempuei neh amih te thawng sawmli thawng nga neh ya rhuk sawmnga la soep saeh. 2:16 Reuben rhaehhmuen kah boeih te thawng yakhat neh thawng sawmnga thawng khat neh ya li sawmnga la soep saeh. Amih kah caempuei te a pabae ah cet saeh. 2:17 Te vaengah Levi rhaehhmuen kah tingtunnah dap lambong laklung ah cet saeh. A rhaeh uh vanbangla hlang he amah hnitai hmuikah amah kah hmuen ah cet tangloeng saeh. 2:18 Ephraim caem kah hnitai a caempuei neh khotlak ah om saeh lamtah Ephraim ca rhoek kah khoboei tah Ammihud capa Elishama saeh. 2:19 A caempuei neh amih te thawng sawmli neh ya nga soep saeh. 2:20 A hmatoeng te Manasseh koca saeh lamtah Manasseh ca rhoek kah khoboei tah Pedahzur capa Gamaliel saeh. 2:21 A caempuei neh amih te thawng sawmthum thawng hnih ya hnih la soep saeh. 2:22 Benjamin koca neh Benjamin ca rhoek kah khoboei tah Gideoni capa Abidan saeh. 2:23 A caempuei neh amih te thawng sawmthum thawng nga neh ya li la soep uh. 2:24 Ephraim caem te thawng yakhat phoeiah thawng rhet neh ya khat la boeih soep saeh. Amih kah caempuei te a pathum ah cet saeh. 2:25 Dan caem kah hnitai tah a caempuei neh tlangpuei ah om saeh lamtah Dan ca rhoek kah khoboei tah Ammishaddai capa Ahiezer saeh. 2:26 A caempuei neh amih te thawng sawmrhuk thawng hnih neh ya rhih la soep saeh. 2:27 A hmatoeng kah aka rhaeh Asher koca neh Asher ca rhoek kah khoboei tah Okran capa Pagiel saeh. 2:28 A caempuei neh amih te thawng sawmli thawng khat ya nga soep saeh. 2:29 Naphtali koca neh Naphtali ca rhoek kah khoboei tah Enan capa Ahira saeh. 2:30 A caempuei neh amih te thawng sawmnga thawng thum neh ya li soep saeh. 2:31 Dan caem khuikah boeih he thawng yakhat neh thawng sawmnga thawng rhih ya rhuk la soep uh tih a hnukkhoem la a hnitai neh cet uh saeh. 2:32 Israel ca rhoek te a napa rhoek imkhui neh a soep tih a caempuei lamloh a caem te boeih a soep vaengah thawng ya rhuk neh thawng thum ya nga sawmnga lo,” a ti nah. 2:33 Tedae Levi rhoek tah BOEIPA loh Moses a uen vanbangla Israel ca khui ah soep uh thil pawh. 2:34 BOEIPA loh Moses a uen bangla a cungkuem te Israel ca rhoek loh a saii uh. A hnitai hmuiah rhaeh uh tih hlang he amah koca ah a napa imkhui neh cet uh.