Library · hlt

Proverbs 2

2:1 Ka ca, ka ol na doe tih ka olpaek he na khuiah na khoem atah, 2:2 Cueihnah te na hna neh hnatung lamtah na lungbuei te lungcuei taengla maelh. 2:3 Yakmingnah ham te khue tih lungcuei ham na ol na huel atah, 2:4 Te te cak bangla na moeh tih kawn bangla na thaih atah, 2:5 BOEIPA hinyahnah te yakming lamtah Pathen kah mingnah te dang van. 2:6 BOEIPA long tah a ka dong lamkah cueihnah ni mingnah neh lungcuei la a paek. 2:7 Aka thuem ham tah lungming cueihnah khaw a khoem a khoem pah tih thincaknah neh aka cet ham photling la om. 2:8 Tiktamnah kah caehlong te a kueinah tih a hlangcim, hlangcim kah longpuei tah a ngaithuen pah. 2:9 Te daengah ni duengnah, tiktamnah, vanat la namtlak then boeih te na yakming eh. 2:10 Cueihnah te na lungbuei khuila ha kun vaengah mingnah loh na hinglu te a hmae sak ni. 2:11 Thuepnah loh nang te n'ngaithuen vetih lungcuei loh nang n'kueinah ni. 2:12 Boethae longpuei lamkah khaw, calaak ol aka thui hlang taeng lamkah khaw nang ng'huul ni. 2:13 Hmaisuep longpuei ah pongpa hamla, a dueng caehlong a toeng. 2:14 Boethae saii ham ko aka hoe loh boethae calaak dongah omngaih uh. 2:15 A caehlong aka paihaeh sak rhoek loh a namtlak ah kho a hmang. 2:16 Kholong hlanglak nu taeng lamkah neh anih kah hoem ol khui lamloh nang aka huul ham ni. 2:17 A camoe kah a boeihlum te a hnoo tih a Pathen kah paipi te a hnilh. 2:18 A imkhui khaw duek hamla aka a namtlak khaw sairhai taengla ngooi coeng. 2:19 Anih taengla aka pawk boeih tah ha mael uh voel pawt dae hingnah caehlong khaw kae uh hae pawh. 2:20 Te daengah ni hlang then longpuei ah na pongpa vetih hlang dueng kah caehlong khaw na ngaithuen eh. 2:21 Aka thuem rhoek long tah khohmuen te kho a sak uh thil vetih a khuiah kodam la sueng uh ni. 2:22 Tedae halang rhoek tah khohmuen lamloh a hnawt uh vetih hnukpoh rhoek khaw a khui lamkah a phuk uh ni.