Proverbs 3
3:1 Ka ca, kai kah olkhueng he hnilh boel lamtah ka olpaek he na lungbuei loh kueinah saeh.
3:2 Na hingnah khohnin neh kum a sen vaengah nang hamla ngaimongnah han thap uh bitni.
3:3 Sitlohnah neh uepomnah loh nang te n'hnoo boel saeh. Te te na rhawn dongah hlaengtang lamtah na lungbuei cabael dongah daek lah.
3:4 Te tlam te Pathen neh hlang mikhmuh ah mikdaithen neh lungmingnah then te dang van lah.
3:5 BOEIPA dongah na lungbuei boeih neh pangtung lamtah namah kah yakmingnah dongah hangdang boeh.
3:6 Na longpuei boeih ah amah te ming lamtah amah loh na caehlong a dueng sak bitni.
3:7 Na mikhmuh dawk neh aka cueih la om boeh, BOEIPA te rhih lamtah boethae te nong tak.
3:8 Na tharhui ham sadingnah neh na rhuh ham a hliing la om ni.
3:9 BOEIPA te na boeirhaeng neh, na cangvuei boeih khuikah a tanglue neh thangpom lah.
3:10 Te daengah ni na khai te khobuh neh baetawt vetih misur thai khaw na va-am dongah puh ni.
3:11 BOEIPA kah thuituennah he ka ca nang loh sawtsit boel lamtah amah kah toelthamnah te na mueipuel sak boeh.
3:12 BOEIPA loh a lungnah te tah a tluung dae pa bangla capa te a moeithen.
3:13 Cueihnah aka hmu hlang neh lungcuei aka dang hlang tah a yoethen pai.
3:14 A thenpom te tangka thenpom lakah, a cangvuei khaw sui lakah then.
3:15 Te tah lungvang lakah kuel ngai tih na ngaihnah boeih long khaw pha uh mahpawh.
3:16 A bantang ah hinglung vang nah, a banvoei ah khuehtawn neh thangpomnah om.
3:17 A longpuei te omthennah longpuei la om tih a hawn te ngaimongnah la boeih om.
3:18 Hingnah thingkung cueihnah aka kop ham neh aka tu ham tah a uem om pai.
3:19 BOEIPA loh cueihnah neh diklai a suen tih a lungcuei neh vaan a soepboe.
3:20 A mingnah rhangneh a dung khaw ueth tih khomong khaw buemtui la pha.
3:21 Ka ca na mik te khohmang boel saeh, lungming cueihnah neh thuepnah te kueinah ne.
3:22 Na hinglu ham hingnah neh na rhawn ham mikdaithen la om ni.
3:23 Te vaengah na longpuei te ngaikhuek la na cet vetih na kho tongtah mahpawh.
3:24 Na yalh vaengah na rhih voel pawt vetih na yalh thuk neh na ih khaw tui ni.
3:25 Birhihnah aka pai buengrhuet neh halang rhoek aka muk khohli rhamrhael te khaw rhih boeh.
3:26 BOEIPA tah nang ham uepnah la om vetih na kho te doong dong lamloh hang hoep bitni.
3:27 A kungmah lamkah hnothen te hloh boeh. Na kut loh a saii ham vaengah na kut te Pathen dongah om saeh.
3:28 Namah taengah a om lalah na hui te, “Na hui taengah cet dae, thangvuen ah ha mael lamtah kam paek bitni,” ti nah boeh.
3:29 Namah taengah ngaikhuek la kho aka sa na hui te boethae neh phoh thil boeh.
3:30 Boethae la nang aka saii pawt hlang te lungli lungla la oelh rhoe oelh boeh.
3:31 Kuthlahnah hlang taengah thatlai boeh, anih kah longpuei te pakhat khaw tuek boeh.
3:32 BOEIPA kah a tueilaehkoi loh kho a hmang dae aka thuem taengah a baecenol om.
3:33 Halang im ah BOEIPA kah tapvoepnah om dae hlang dueng tolkhoeng tah yoe a then sak.
3:34 Hmuiyoi rhoek ngawn tah amah loh a hnael vetih mangdaeng neh kodo te mikdaithen la a khueh.
3:35 Thangpomnah tah aka cueih rhoek loh a pang uh tih aka ang loh yah a ludoeng.