Library · hlt

Proverbs 30

30:1 Jakeh capa Agur kah ol he, Ithiel hlang, Ithiel neh Ukal taengah olphong olrhuh la om. 30:2 Kai he hlang lakah ka kotalh ngawn cakhaw, hlang loh kai taengah yakmingnah khueh pawh. 30:3 Cueihnah ka cang pawt dae, a cim mingnah te ka ming. 30:4 Ulae vaan la aka luei tih aka rhum? A kutnarhum dongah khohli aka buem te ulae? Himbai dongah tui aka cun te ulae? Diklai khobawt boeih aka thoh te ulae? A ming ta melae, a capa ming ta balae? na ming atah. 30:5 Pathen kah olthui boeih tah cilpoe la om. Amah dongah aka ying rhoek ham tah photling la a om pah. 30:6 A ol te thap boeh, namah te n'tluung vetih na laithae phoe ve. 30:7 Namah taeng lamkah te panit ni kam bih. Ka duek hlanah kai taengah hloh boeh. 30:8 A poeyoek neh laithae ol tah kai taeng lamloh hla saeh. Kai taengah he khodaeng khaw, khuehtawn khaw m'pae boeh. Ka buhvae dongkah buhham mah kai n'cah mai. 30:9 Ka kum vaengah tah ka basa vetih, “BOEIPA te unim,” vik ka ti tholh ve. Ka khawk vaengah ka huen vetih ka Pathen ming te ka pha tholh ve. 30:10 A boei taeng, a boei taengah sal te thet pah boeh. Namah te thae m'phoei thil vetih, na boe ve. 30:11 A napa kah cadilcahma aka tap loh a manu te khaw a uem noek moenih. 30:12 A khawt te sil pawt dae, amah mikhmuh neh aka cim cadilcahma, 30:13 A mik neh mat pomsang uh tih, a mikkhu aka huel cadilcahma, 30:14 A no te cunghang bangla, a pumcu te tumcaca bangla, diklai mangdaeng neh khodaeng hlang aka yoop cadilcahma, 30:15 Vawt canu rhoi loh, “M'pae, m'pae,” a ti. Pathum khaw cung rhoi pawh. Pali khaw, “Rhoeh coeng,” ti rhoi pawh. 30:16 Saelkhui neh caya kah a bung, tui aka hah pawh diklai, rhoeh aka ti tlaih pawh hmai pawn ni. 30:17 A napa aka tamdaeng tih, a manu kah boengainah dongah aka hnoelrhoeng kah a mik tah, soklong vangak loh a koeih vetih atha ca loh a caak ni. 30:18 Amih pathum mah kai ham tah khobaerhambae coeng dae, a pili phoeikah amih pali he khaw ka ming thai moenih. 30:19 Vaan ah atha kah longpuei, lungpang dongah rhul kah longpuei, tuitun tuilung kah sangpho longpuei, hula taengkah tongpa longpuei he ni. 30:20 Samphaih nu kah a khosing tah, a caak neh a ka a huih tih, “boethae ka saii pawh,” a ti. 30:21 Diklai aka tlai sak pathum neh diklai loh a phueih thai pawh pali tah, 30:22 Sal te tloep a manghai vaengah, aka ang te buh a hah vaengah, 30:23 Rhukom te tloep a hmuhuet vaengah, imom loh a boeinu a pang vaengah, 30:24 Amih pali he diklai hmankah a yit koek la om dae cueih rhoela cueih uh. 30:25 Lunghi he a pilnam khaw tlung pawt dae, khohal ah amamih caak te a soepsoei coeng. 30:26 Saphih khaw a pilnam te pilnu pawt dae, thaelpang khuiah a im a khueh. 30:27 Kaisih te manghai tal dae a pum la huek khong uh. 30:28 Imrhai loh kut neh na tuuk mai tih, amah tah manghai kah bawkim ah na om van bal. 30:29 Khokan aka yanghoep pathum neh a caeh aka thuem pali tah amih ni. 30:30 Sathueng tah Rhamsa boeih lakah tlung tih, a mikhmuh kah boeih tah mael tak pawh. 30:31 A cinghen aka caplawh maaetal neh manghai amah taengah aka bop rhoek. 30:32 Dangrhoek ham vaengah na tahah tih na mangtaeng akhaw na ka te na kut neh buem. 30:33 Suktui a ken vaengah suknaeng la poeh. Hnarhong a pai vaengah thii long. Thintoek a phul vaengah tuituknah la coeng.