Proverbs 31
31:1 Manghai Lemuel kah olka olrhuh. He nen ni amah khaw a manu loh a toel.
31:2 Ka ca me tlam lae? Ka bungko lamkah ka capa me tlam lae? Ka olcaeng dong lamkah ka capa me tlam lae?
31:3 Na thadueng te huta pum dongah pae tarha boeh, na longpuei te manghai rhoek aka khoe ham ni te.
31:4 Manghai Lemuel ham bueng moenih. Manghai rhoek loh misurtui a ok ham moenih. Boeica rhoek long khaw yu a tuep ham moenih.
31:5 A ok tih a taem te a hnilh atah, phacip phabaem ca boeih kah dumlai te talh ve.
31:6 Yu te aka milh taengah, misur te a hinglu aka khahing taengah pae uh.
31:7 O saeh lamtah a khodaeng te hnilh saeh. A thakthaenah khaw koep poek boel saeh.
31:8 Olmueh ham khaw, cadah cadum ca boeih kah dumlai ham khaw na ka te ong pah.
31:9 Na ka te ong lamtah duengnah neh laitloek pah. Mangdaeng neh khodaeng te khaw tang sak lah.
31:10 Tatthai nu he unim aka hmu? Lungvang lakah a phu khaw kuel.
31:11 A boei kah lungbuei khaw anih dongah pangtung tih, kutbuem khaw vaitah pawh.
31:12 A boei te hnothen neh a thuung tih, a hing tue khuiah boethae om pawh.
31:13 Tumul neh hlamik a tlap tih a kut naep la a saii.
31:14 thimpom sangpho bangla om tih, amah caak khaw khohla bangsang lamkah hang khuen.
31:15 Khoyin ah thoo tih a imkhui ham maeh, a tanu rhoek ham hma a taeng pah.
31:16 Khohmuen te a mangtaeng tih, amah kutci neh a lai. Misur khaw a tue rhoe la a tue coeng.
31:17 A cinghen te sarhi neh a yen tih, a bantha khaw a huel.
31:18 A thenpom kah a then te a ten tih, khoyin, khoyin ah a hmaithoi khaw thi tlaih pawh.
31:19 Cunghmui te a kut a yueng thil tih, a kutbom neh tahcap a cap.
31:20 A kutpha loh mangdaeng a koihlawm tih, a kut te khodaeng hamla a yueng pah.
31:21 A imkhui boeih loh pueinak a lingdik neh a om dongah, vuel tue ah khaw, a imkhui ham rhih voel pawh.
31:22 Hniphaih te amah ham a tah tih, a hnitang neh daidi pueinak khaw om.
31:23 A boei te vongka ah a ming uh tih, khohmuen kah a ham rhoek taengah a ngol sak.
31:24 Hni a tah te a yoih tih, lamko te Kanaan taengah a thak.
31:25 Sarhi neh rhuepomnah te a pueinak nah tih, hmailong khohnin ah cupcup nuei.
31:26 A ka te cueihnah neh a ang tih, a lai dongah sitlohnah olkhueng om.
31:27 A imkhui ah rhoilaeng khaw a pai tih, thangak buh khaw ca pawh.
31:28 A ca rhoek loh a thoh hang neh anih te a uem uh tih, a boei long khaw anih te a thangthen bal.
31:29 Huta rhoek loh tatthai la muep a saii uh. Tedae nang long tah amih te a sola boeih na poe coeng.
31:30 Mikdaithen khaw a honghi ni. Sakthen nu khaw a honghi la om. BOEIPA a rhih dongah ni anih te a thangthen.
31:31 A kutci te amah taengah pae uh. A bibi dongah amah te vongka ah thangthen uh saeh.