Proverbs 5
5:1 Ka ca aw, ka cueihnah he hnatung lamtah ka lungcuei dongla na hna kaeng lah.
5:2 Thuepnah neh mingnah te ngaithuen hamla na hmuilai long khaw tuem uh saeh.
5:3 Rhalawt nu kah a hmuilai ah khoilitui cip tih a lai khaw situi lakah hnal.
5:4 Tedae hmailong ah tah anih te pantong bangla khahing tih cunghang paihat bangla haat.
5:5 A kho te dueknah khuila suntla tih a khokan loh saelkhui la a doek.
5:6 Hingnah caehlong lakah a ming pawh a namtlak likloek te saelh ve ne.
5:7 Te dongah ka ca rhoek kai ol he hnatun uh laeh, ka ka dongkah olthui te nong tak boeh.
5:8 Na longpuei te anih neh lakhla sak lamtah a im thohka lam khaw mop boeh.
5:9 Na mueithennah te a tloe taengla ham pae vetih na kum muenying muenyang la hang khueh ve.
5:10 Na thadueng te rhalawt rhoek cung uh vetih na patangnah phu te kholong imkhui la pawk ve.
5:11 Na hmailong ah na nguek vetih na pum na saa khaw hmawn hae ni.
5:12 Te vaengah, “Thuituennah te ka hmuhuet tih toelthamnah khaw ka lungbuei loh a tlaitlaek pai.
5:13 Ka saya ol te ka hnatun pawh kai aka cang puei taengah khaw ka hna ka kaeng pawh.
5:14 Hlangping neh rhaengpuei lakli kah boethae sumsiit te vat ka pha,” na ti hae ni
5:15 Na tuitung dongkah tui neh na tuito lamtah aka sih te o.
5:16 Na tuisih te kawtpoeng ah, sokca tui te toltung ah phuet saeh.
5:17 Nang namah bueng hamla om saeh lamtah na taengkah kholong ham boel saeh.
5:18 Na thunsih te yoethen la om saeh lamtah na camoe kah na yuu dongah kohoe sak.
5:19 Anih tah sayuk rhuinu lunguem bangla, a sukbam te sakhi rhuinu mikdaithen bangla a tuetang boeih ah nang te m'hmilhmal sak saeh lamtah a lungnah loh m'palang sak yoeyah saeh.
5:20 Ba ham lae ka ca loh rhalawt la na palang vetih kholong kah a rhang te na kop eh.
5:21 Hlang kah longpuei neh a namtlak boeih a saelh te khaw BOEIPA mikhmuh ah om.
5:22 Halang te amah kathaesainah loh amah te a tuuk tih a tholhnah rhui loh a ban.
5:23 Anih thuituennah a om pawt dongah duek vetih a anglat aih dongah palang ni.