Library · hlt

Proverbs 6

6:1 Ka ca, na hui ham rhi na khang tih kholong ham na kut na tum atah, 6:2 Na ka dongkah olthui loh n'hlaeh coeng tih na ka dongkah olthui loh n'khaih. 6:3 Te te na saii dongah ka ca aw, na huul uh cakhaw na hui kah kut ah ni na pha hae. Te dongah cet, mawn lamtah na hui hloep laeh. 6:4 Na mik te ih sak boeh, na mikkhu te ngam boeh. 6:5 Kut dongkah kirhang bangla sayuep kut dongkah vaa bangla namah huul uh laeh. 6:6 Kolhnaw aw lunghi taengla cet lah, anih kah khosing ke hmu lamtah cueih van lah. 6:7 A taengah rhalboei khaw, rhoiboei khaw, aka taemrhai ham khaw om mai pawh. 6:8 Khohal ah a buh te a soepsoei tih cangah ah a caak te a yoep. 6:9 Kolhnaw aw me hil nim na yalh vetih na ih lamloh me vaengah nim na thoh ve? 6:10 Bet ih, bet ngam, kut poem bet neh na yalh. 6:11 Te vaengah na khodaeng te aka cet paitai bangla, na tloelnah loh photling aka bai hlang bangla ha pawk ni. 6:12 Aka muen hlang neh boethae hlang tah a ka dongkah olhmaang nen ni a pongpa. 6:13 A mik neh a mikhip, a kho neh a thui, a kutdawn neh a thuinuet. 6:14 A lungbuei kah a calaak neh a tuetang takuem ah boethae bueng a paem tih, tingtoehnah neh hohmuhnah a khuen. 6:15 Te dongah amah kah rhainah loh buengrhuet a thoeng thil vetih hoeihnah om kolla khaem pahoi ni. 6:16 He parhuk he BOEIPA loh a thinah tih a hinglu dongah tueilaehkoi khuikah tueilaehkoi parhih tah. 6:17 A honghi lai aka ludoeng kah a mik, ommongsitoe kah thii aka long sak kah a kut, 6:18 Boethae kopoek aka paem lungbuei, boethae dongla aka yong paitok kho, 6:19 A hong kah laipai loh laithae ol a sat tih pacaboeina lakli ah tingtoehnah la a khuen. 6:20 Ka ca, na pa kah olpaek te kueinah lamtah na nu kah olkhueng phap sut boeh. 6:21 Na lungbuei ah rhawp hlaengtang lamtah na rhawn ah rhawp laikoeinah lah. 6:22 Na caeh vaengah nang m'mawt vetih na yalh vaengah nang te n'tawt ni, na haenghang vaengah nang n'lolmang puei ni. 6:23 Olpaek tah hmaithoi ni, olkhueng khaw vangnah ni, thuituennah dongkah toelthamnah khaw hingnah longpuei ni. 6:24 Huta thae taeng lamkah neh kholong nu ol hnal lamloh nang aka ngaithuen ham ni. 6:25 A sakthen te na thinko nen khaw nai boeh, a mikkhu neh nang te n'hloih boel saeh. 6:26 Pumyoi nu tah buh hluem ham ni, tedae hlang yuu loh hinglu phutlo khaw a hoem. 6:27 Hlang kah a rhang dongah hmai a poep lalah a himbai te hoeh mahpawt a? 6:28 Hlang pakhat te hmai-alh dongah a caeh lalah a kho te duih mahpawt a? 6:29 A hui kah yuu te aka kun thil tih aka ben tah pakhat khaw hmil tangloeng mahpawh. 6:30 A hinglu kah a lamlum dip sak hamla a huen atah hlanghuen te hlang loh hnoelrhoeng mahpawt a? 6:31 A hmuh uh atah a pueh parhih la a sah saeh lamtah a im kah a boei a rhaeng te boeih a phai saeh. 6:32 Lungbuei aka talh huta tah samphaih, a hinglu aka phae long ni te te a saii. 6:33 Tlohtat neh yah a dong vetih anih kokhahnah te hmata mahpawh. 6:34 Phulohnah khohnin ah a va kah kosi neh thatlainah dongah lungma ti mahpawh. 6:35 A mikhmuh kah tlansum pakhat khaw khuen pah pawt vetih kapbaih yet cakhaw huem pah mahpawh.