Proverbs 9
9:1 Cueihnah loh a im a sak tih a tung parhih a vueh.
9:2 A maeh te a ngawn tih misurtui neh a thoek tih a caboei te a tawn.
9:3 Amah kah hula rhoek te a tueih tih, vangpuei hmuensang dangdoe lamkah a khue.
9:4 Te phoeiah, “Unim hlangyoe, anih te lungbuei a talh khaw pahoi nong tak saeh.
9:5 Halo, ka buh he ang uh lamtah misur ka thoek he o uh.
9:6 Hlangyoe te hnoo lamtah hing uh, yakmingnah longpuei te uem uh.
9:7 Hmuiyoi aka toel tah amah loh yah a poh tih, halang aka tluung tah amah loh nganboh a yook.
9:8 Hmuiyoi te tluung boeh namah m'hmuhuet ve. Aka cueih tah na tluung cakhaw nang n'lungnah ni.
9:9 Aka cueih te pae lah taoe cueih ni, aka dueng te na tukkil atah rhingtuknah a thap ni.
9:10 BOEIPA hinyahnah tah cueihnah lamhma la om tih aka cim mingnah he yakmingnah la om.
9:11 Kai rhangneh na khohnin te puh vetih nang hamla hingnah kum khaw a thap ni.
9:12 Na cueih la na cueih mak atah namah ham ngawn ni. Hmui na yoih atah nang namah long ni na phueih eh.
9:13 Angvawk nu loh a poeyoek la kawk tih bang khaw ming pawh.
9:14 Tedae a im thohka neh vangpuei hmuensang kah ngolkhoel dongah ngol.
9:15 Te vaengah a caehlong a dueng la longpuei ah aka pongpa rhoek te a khue.
9:16 “Hlangyoe neh lungbuei aka talh tah pahoi ha pah saeh.
9:17 A tui huen aka tui sak tih yinhnuk buh neh aka hmae,” a ti.
9:18 Tedae saelkhui laedil ah sairhai pahoi a khue pah te ming pawh.