Psalms 102
102:1 Mangdaeng a rhae vaengah BOEIPA mikhmuh ah a kohuetnah a hawk tih a thangthuinah BOEIPA aw ka thangthuinah he ya lamtah ka pang ol loh nang taengla ham pha saeh.
102:2 Kai kah puencak tue vaengah na maelhmai te kai taeng lamkah thuh boeh. Kang khue tue vaengah kai taengla na hna han kaeng lamtah kai he koe n'doo lah.
102:3 Ka khohnin he hmaikhu bangla hmata tih ka rhuhrhong khaw hmaingen bangla tlum.
102:4 Ka lungbuei he baelhing bangla a haih tih a rhae sut dongah ka buh caak pataeng ka hnilh coeng.
102:5 Ka hueinah ol dongah ka pumsa tah ka rhuh dongla kap coeng.
102:6 Khosoek kah khosoek saelbu bangla ka lutlat sut tih, imrhong thathawt bangla ka om.
102:7 Ka hak ah khaw imphu kah aka pangoe vaa bangla ka om.
102:8 Ka thunkha loh hnin takuem kai m'veet uh tih kai aka yan rhoek loh kai ming neh a toemngam uh.
102:9 Hmaiphu te buh la ka caak tih ka tuiok khaw rhahnah neh ka thoek.
102:10 Kai nan ludoeng tangtae khaw na kosi, na thinhul neh kai nan voeih.
102:11 Ka khohnin he mueihlip bangla puh tih baelhing bangla ka rhae sut.
102:12 Tedae BOEIPA namah tah kumhal ah na ngol coeng tih namah poekkoepnah tah cadilcahma phoeikah cadilcahma duela om.
102:13 Na thoo vetih a tue bangla Zion na haidam bitni. Anih rhen hamla khoning a pha coeng dongah.
102:14 Na sal rhoek loh Zion kah lungto te a ngaingaih uh tih a laipi te khaw a rhen uh.
102:15 Te dongah BOEIPA namah ming te namtom rhoek loh, namah thangpomnah te diklai manghai boeih loh a rhih uh ni.
102:16 Zion te BOEIPA loh a thoh vetih a thangpomnah neh phoe ni.
102:17 Dueidah thahnoeng thangthuinah taengla mael vetih amih kah thangthuinah te sit mahpawh.
102:18 Hmailong kah cadilcahma ham khaw hekah he daek saeh lamtah a suen pilnam loh BOEIPA thangthen saeh.
102:19 A sang hmuencim lamkah a dan tih diklai te BOEIPA loh vaan lamkah a paelki.
102:20 Thongtl a kah a kiinah hnatun ham, dueknah khuikah hlang rhoek te hlah ham,
102:21 BOEIPA ming te Zion ah, amah koehnah te khaw Jerusalem ah doek ham om ni.
102:22 BOEIPA taengah thothueng ham pilnam rhoek neh ram rhoek tah tun tingtun uh ni.
102:23 Ka thadueng he longpuei ah a khah tih, ka khohnin khaw a rhaem.
102:24 Te dongah, “Ka Pathen aw, kai kah ka khohnin he a boengli ah lo boel mai. Namah kah kum tah cadilcahma phoeikah cadilcahma due khaw a pha kanoek.
102:25 A cuek vaengah diklai na suen tih vaan ke khaw namah kutngo ni.
102:26 Amih te milh uh cakhaw namah tah na nguel yoeyah. Te dongah amih te himbai bangla boeih hnawn uh vetih pueinak bangla na tho vaengah thovael uh van ni.
102:27 Tedae namah tah amah la na om tih na kum khaw bawt pawh.
102:28 Na sal rhoek kah a ca rhoek loh kho a sak uh vetih a tiingan loh namah mikhmuh ah pai ni,” ka ti.