Psalms 103
103:1 David kah Aw ka hinglu, BOEIPA te uem lamtah, ka kotak boeih loh a ming cim te uem lah.
103:2 Aw ka hinglu, BOEIPA te uem lamtah amah kah a thaphu paek boeih te hnilh boeh.
103:3 Nang kathaesainah boeih te khodawk han ngai tih, na tlohtat boeih aka hoeih sak,
103:4 Na hingnah vaam khui lamkah aka tlan tih sitlohnah neh haidamnah te nang aka khuem sak loh,
103:5 Na kamrhui te hnothen neh a kum sak tih na camoe tue te atha bangla a thahuel sak.
103:6 Hlang kah hnaemtaek aka yok rhoek boeih ham BOEIPA loh duengnah neh tiktamnah a saii pah.
103:7 Moses taengah amah khosing, Israel ca rhoek taengah a khoboe te a tueng.
103:8 Thinphoei neh lungvatnah BOEIPA loh thintoek a ueh tih sitlohnah neh baetawt.
103:9 A yoeyah la ho pawt vetih, kumhal duela lunguen mahpawh.
103:10 Mamih kah tholhnah bangla mamih taengah saii pawt tih mamih kathaesainah bangla mamih taengah han suk moenih.
103:11 Diklai soah vaan a sang bangla amah aka rhih rhoek ham a sitlohnah khaw len.
103:12 Khocuk lamkah khotlak a lakhla bangla mamih kah boekoeknah te mamih taeng lamkah a lakhla sak coeng.
103:13 A nap a loh camoe rhoek te a haidam bangla amah aka rhih rhoek te BOEIPA loh a haidam.
103:14 Amah loh mamih kah benbonah he a ming tih mamih he laipi ni tila a poek.
103:15 Hlanghing kah a tue sulrham bangla om tih khohmuen tamlaep bangla khooi van mai.
103:16 Khohli loh anih a pah tih a hmata atah amah hmuen hmat voel pawh.
103:17 Tedae BOEIPA kah sitlohnah tah amah aka rhih rhoek taengah khosuen lamkah kumhal duela om tih a duengnah a ca rhoek kah a ca rhoek patoeng taengah,
103:18 a paipi aka tuem tih a olrhi vai ham aka thoelh rhoek taengah om.
103:19 BOEIPA loh vaan ah a ngolkhoel a hol tih a ram a cungkuem te a taemrhai.
103:20 A olthui ol ngai ham amah kah olka bangla aka saii, thadueng puencawn, hlangrhalh rhoek loh BOEIPA te uem uh lah.
103:21 Amah kah caempuei boeih loh BOEIPA te uem uh lamtah amah kah bibi boeih loh a kolonah te saii uh lah.
103:22 A khohung hmuen boeih kah a kutngo boeih BOEIPA te uem uh lah. Aw ka hinglu, BOEIPA te uem lah.