Library · hlt

Psalms 104

104:1 Aw ka hinglu, BOEIPA te uem lah. Ka BOEIPA Pathen namah tah na sang tangkik tih mueithennah neh rhuepomnah te na bai. 104:2 Khosae neh himbai bangla muelh aka thing uh himbaiyan bangla vaan ah dup aka phaih, 104:3 A imhman te tui soah aka ci, khomai te leng la aka saii, khohli phae neh aka cet, 104:4 khohli te a puencawn la aka saii tih hmai tak aka tueih loh, 104:5 diklai khaw amah hmuen ah a suen tih kumhal ah tuen yoeyah pawh. 104:6 Anih te tuidung neh pueinak bangla na khuk tih tui rhoek loh tlang rhoek soah pai uh. 104:7 Namah kah tluungnah dongah rhaelrham uh tih na khohum ol dongah tamto uh. 104:8 Tlang tom a lan uh tih amih ham na suen kolbawn hmuen la suntla uh. 104:9 Khorhi na suem te a poe uh thai pawt dongah diklai khuk ham ha mael uh thai pawh. 104:10 Tuisih rhoek te soklong la a loei tlang rhoek laklo ah long uh. 104:11 Kohong kah mulhing boeih te tui a tul uh tih kohong marhang rhoek khaw a tuihalh dip uh. 104:12 A taengah vaan kah vaa loh kho a sak uh tih thingsam laklo ah a ol huphup loei. 104:13 Tlang boeih te a imhman lamkah aka suep, BOEIPAnamah kah kutci loh diklai te a hah sak. 104:14 Rhamsa ham sulrham poe tih, hlang kah thohtatnah hamla baelhing neh, diklai lamkah buh na thoeng sak. 104:15 Te dongah misurtui loh hlanghing thinko ko a hoe sak, situi loh maelhmai a hlampan sak tih buh loh hlanghing thinko a duel. 104:16 BOEIPA loh a ling thingkung, Lebanon kah lamphai te a kum sak uh. 104:17 Teah te vaa loh bu a tuk tih, bungrho loh hmaical dongah a im a khueh. 104:18 Tlang sang boeih te sathai ham om tih, pango boeih khaw saphih ham hlipyingnah la om. 104:19 Khoning ham hla a saii tih khomik loh a khotlak khaw a ming. 104:20 Khohmuep na khueh tih khoyin ha pawk vaengah duup kah mulhing boeih loh a khuiah yuel uh. 104:21 Maeh te sathueng rhoek loh a kawk thil uh tih a caak te Pathen taengah a tlap uh. 104:22 Khomik a thoeng neh vawl khoem uh tih a khuisaek la kol uh. 104:23 Hlang he a bisai ham neh a thohtatnah la kholaeh hil cet. 104:24 BOEIPA nang kah kutngo he yet tangkik. Te rhoek boeih te cueihnah nen ni na saii. Na hnopai rhoemah diklai ah baetawt coeng. 104:25 Tuitunli aka len tih a dang, aka dangka ah, rhulcai mulhing a yit a len tae lek pawt la om bal. 104:26 Teah te sangpho rhoek loh pongpa uh tih a khuiah aka luem ham Leviathan te na saii. 104:27 A tuetang vaengah amih caak paek ham khaw amih loh namah taengla boeih lamso uh. 104:28 Amih taengah na paek te a rhuh uh. Na kut na hlam tih hnothen kum uh. 104:29 Na maelhmai na thuh vaengah let uh. A hil na khoem pah vaengah pal uh tih laipi la bal uh. 104:30 Na mueihla na tueih daengah anmih te suen uh tih diklai maelhmai khaw na tlaih pueng. 104:31 BOEIPA kah thangpomnah tah kumhal duela om tih, a bibi dongah BOEIPA a kohoe saeh. 104:32 Diklai a paelki vaengah thuen tih, tlang rhoek te a taek vaengah khuu. 104:33 Ka hingnah neh BOEIPA te ka hlai vetih ka om rhuet vaengah ka Pathen te ka tingtoeng ni. 104:34 Ka olding he anih ham a lungtui saeh. Kai tah BOEIPA dongah ka kohoe coeng. 104:35 Hlangtholh rhoek te diklai lamloh mitmoeng uh saeh lamtah halang rhoek khaw koep om boel saeh. Aw ka hinglu, BOEIPA tah a yoethen pai saeh tila BOEIPA te thangthen lah.