Library · hlt

Psalms 106

106:1 BOEIPA te thangthen uh. Amah kah sitlohnah tah kumhal hil ham a then dongah BOEIPA te uem uh lah. 106:2 BOEIPA kah thayung thamal te unim aka thui thai vetih amah koehnah te boeih aka yakming thai eh? 106:3 A tuetang boeih dongah tiktamnah aka ngaithuen tih duengnah aka saii tah a yoethen pai saeh. 106:4 Aw BOEIPA, na pilnam kah kolonah khuiah kai m'poek lamtah namah kah khangnah neh kai n'hip lah. 106:5 Na coelh rhoek kah hnothen te hmuh sak ham, na namtu kah kohoenah dongah kohoe sak ham, na rho neh thangthen ham ni. 106:6 A pa rhoek neh ka tholh uh dongah, paihaeh la ka boe uh. 106:7 A pa rhoek loh Egypt ah nang kah khobaerhambae bangla cangbam uh pawt tih, na sitlohnah cungkuem te a poek uh pawt dongah, tuitunli kah carhaek li ah a koek uh. 106:8 Tedae a ming neh a thayung thamal te ming sak hamla amih te a khang. 106:9 Carhaek li te a ho tih a kak sak phoeiah tuidung longah khosoek bangla amih te a caeh puei. 106:10 Te vaengah amih te a lunguet kut lamloh a khang tih thunkha kut lamkah a tlan. 106:11 A rhal rhoek te tui loh a khuk uh tih pakhat kangna khaw sueng uh pawh. 106:12 A olkhueh te a tangnah uh tih amah koehnah te a hlai uh. 106:13 A bibi te koeloe a hnilh uh tih a oluen te rhing uh pawh. 106:14 Te dongah khosoek ah hoehhamnah a pael uh tih khopong ah Pathen a noemcai uh. 106:15 Amih kah huithuinah te a paek ngawn dae a hinglu dongah pimyet a tueih pah. 106:16 Rhaehhmuen ah Moses taeng neh BOEIPA kah hlang cim Aron taengah thatlai uh. 106:17 Diklai te ang tih Dathan te a dolh dongah Abiram hlangboel te khup a vuei. 106:18 A hlangboel lakliah hmai loh rhong tih halang rhoek te hmaisai loh a hlawp. 106:19 Horeb ah vaitoca mueihlawn a saii uh tih a bawk uh. 106:20 Amih kah thangpomnah te rham aka ca vaitotal muei la a hoi uh. 106:21 Egypt ah hno len a saii tih amih aka khang Pathen, 106:22 Ham kho ah khobaerhambae aka saii, Carhaek li ah mueirhih aka saii te a hnilh uh. 106:23 Amih te mitmoeng sak ham a ti vaengah a mikhmuh kah a puut ah a coelh Moses pai pawt koinih a kosi mael pawt vetih a phae pawn ni. 106:24 Sahnaih khohmuen te a hnawt uh dongah a olkhueh te tangnah uh pawh. 106:25 Amih kah dap khuiah cailak uh tih BOEIPA ol te hnatun uh pawh. 106:26 Te dongah amih te khosoek ah cungku sak ham, 106:27 Namtom taengah a tiingan cungku sak ham neh diklai ah thaekyak ham kut a thueng thil. 106:28 Te dongah Baalpeor neh sun uh tih aka duek kah hmueih te a caak uh. 106:29 A khoboe neh BOEIPA a veet uh dongah, amih taengah lucik a pung pah. 106:30 Tedae Phinekha te thoo tih a thangthui daengah lucik khaw cing. 106:31 Te vaengah anih te cadilcahma phoeikah cadilcahma ham kumhal hil duengnah la a nawt. 106:32 Meribah tui taengah a thintoek uh bal tih amih kongah Moses te a talh. 106:33 A mueihla te a koek uh dongah a ka nen khaw cal buengrhuet. 106:34 Amih taengkah BOEIPA loh a uen bangla pilnam rhoek mitmoeng sak uh pawh. 106:35 Tedae namtom rhoek neh pitpom uh hmaih tih amih kah bibi te a awt uh. 106:36 Te dongah amamih ham hlaeh la aka poeh muei taengah tho a thueng uh. 106:37 Te vaengah a ca huta khaw tongpa khaw rhaithae taengla a nawn uh. 106:38 Kanaan muei taengah a nawn uh tih ommongsitoe thii, a ca tongpa neh a ca huta kah thii a long sak uh dongah thii loh diklai a poeih. 106:39 A bibi neh a poeih uh tih a khoboe neh cukhalh uh. 106:40 Te dongah a pilnam te BOEIPA kah thintoek loh sai coeng tih a rho te a tuei. 106:41 Te vaengah amih te namtom kut ah a paek tih a lunguet loh amih te rhep a buem. 106:42 A thunkha rhoek loh amih a nen uh tih a kut hmuiah a kunyun sak uh. 106:43 Amih te koep koep puet a huul coeng dae amamih kah kopoek neh a koek uh dongah amamih kathaesainah neh tlumhmawn uh. 106:44 Tedae amih kah a tamlung te a yaak vaengah amih kah rhal te a hmuh pah. 106:45 Te vaengah a paipi te amih ham a poek pah tih a sitlohnah khuikah a sitlohnah cungkuem neh ko koep a hlawt. 106:46 Te dongah amih aka sol rhoek boeih loh amih taengah haidamnah ham a paek. 106:47 Kaimih kah Pathen BOEIPA kaimih he n'khang lamtah na ming cim uem ham neh nang koehnah dongah ka domyok ham khaw, namtom rhoek kut lamkah kaimih n'coi lah. 106:48 Israel Pathen, BOEIPA tah khosuen lamkah kumhal duela a yoethen pai tih pilnam boeih loh, “Amen, BOEIPA thangthen uh,” ti saeh.