Psalms 107
107:1 A sitlohnah tah kumhal hil ham a then dongah BOEIPA te uem uh lah.
107:2 Rhal kut lamkah a tlan hlang loh BOEIPA kah a tlan te thui saeh.
107:3 Te vaengah amih te khocuk, khotlak, tlangpuei, tuitunli, khohmuen amkah a coi.
107:4 Khosoek khopong ah khopuei tolrhum longpuei a hmuh uh mueh la kho a hmang uh.
107:5 Bungpong neh tuihalh la a khuiah a hinglu te rhae.
107:6 Kho a bing vaengah BOEIPA te a khue uh tih khobing khui lamkah amih te a huul.
107:7 Te dongah amih te tolrhum khopuei la caeh ham a thuem longpuei neh a hoihaeng.
107:8 Hlang koca rhoek ham a sitlohnah neh khobaerhambae aka sai BOEIPA te uem uh pai saeh.
107:9 A hinglu aka halthi te tuihalh a dip pah sak tih a hinglu aka pongnaeng te khaw hnothen a cung sak.
107:10 Hlangvang tah khohmuep neh dueknah hlipkhup kah thirhui neh phacipphabaem la aka ngol thongtla la coeng uh.
107:11 Pathen kah olka te a koek uh tih Khohni kah oluen khaw a tlaitlaek uh.
107:12 Te dongah thakthaenah dongla a kunyun sak tih a lungbuei a toh uh vaengah bom pawh.
107:13 Tedae kho a bing uh vaengah BOEIPA taengla pang uh tih amih te khobing khui lamkah koep a khang.
107:14 Amih te khohmuep neh dueknah hlipkhup lamkah a poh tih a kuelrhui khaw a bawt pah.
107:15 Hlang koca rhoek ham a sitlohnah neh khobaerhambae aka sai BOEIPA te uem uh pai saeh.
107:16 Rhohum thohkhaih te a phil tih thicung thohkalh khaw a tloek.
107:17 Amih tah boekoek longpuei kah hlang ang neh amamih kathaesainah dongah phaep uh.
107:18 A hinglu loh caak boeih a tuei pah uh tih dueknah vongka te a paan uh.
107:19 Kho a bing vaengah BOEIPA taengah pang uh tih amih te khobing khui lamkah a khang.
107:20 A ol a hlah phoeiah amih a hoeih sak tih amih rhomhmop te a poeng a hal sak.
107:21 Hlang koca rhoek ham a sitlohnah neh khobaerhambae aka sai BOEIPA te uem uh pai saeh.
107:22 Te dongah uemonah hmueih te nawn uh saeh lamtah tamlung neh a bibi te doek uh saeh.
107:23 Sangpho neh tuitunli ah suntla uh tih tui puei ah bitat aka saii rhoek loh,
107:24 BOEIPA kah bibi neh a laedil kah khobaerhambae te a hmuh uh.
107:25 A voek vaengah hlipuei khohli thoo tih tuilae khaw samboek.
107:26 Vaan la luei uh tih tuidung la a suntlak uh vaengah a hinglu tah yoethaenah neh paci uh.
107:27 Yurhui bangla lam uh tih a yoka dongah a cueihnah boeih hma uh.
107:28 Kho a bing vaengah BOEIPA taengla pang uh tih amih te khobing khui lamkah a poh.
107:29 Hlipuei te bidip la a duem sak tih tuiphu rhoek khaw ngam uh.
107:30 Tuiphu a sap vaengah a kohoe uh tih amamih kah a naepnah langdai la a mawt.
107:31 Hlang koca rhoek ham a sitlohnah neh khobaerhambae aka sai BOEIPA te uem uh pai saeh.
107:32 Te dongah pilnam hlangping lakliah amah te pomsang uh saeh lamtah patong rhoek kah tolrhum ah thangthen uh saeh.
107:33 Tuiva te khosoek la, tuiphuet tui khaw tuihang la a khueh.
107:34 Cangthen kho khaw boethae loh kho a sak thil dongah lungkaehlai la,
107:35 khosoek te tuibap tui la, rhamrhae lai khaw tuiphuet tui la a khueh.
107:36 Teah te bungpong rhoek kho a sak sak tih tolrhum khopuei a thong uh.
107:37 Te vaengah khohmuen a tawn uh tih misur a tue dongah a vuei a thaih cuen.
107:38 Amih te yoethen a paek tih muep a ping uh vaengah a rhamsa khaw polpai sak pawh.
107:39 Tedae a polpai uh vaengah caya yoethae neh kothae dongah ngam uh sut.
107:40 Hlangcong rhoek te nueihbu a hawk thil tih long mueng hinghong la kho a hmang sak.
107:41 Tedae khodaeng te phacipphabaem lamkah a hoeptlang tih a hui a ko te boiva bangla a khueh.
107:42 Aka thuem rhoek loh a hmuh uh vaengah a kohoe uh dae dumlai boeih long tah a ka khoep a buem.
107:43 U khaw aka cueih long tah hekah he kuem saeh lamtah BOEIPA kah sitlohnah te yakming uh saeh.