Library · hlt

Psalms 116

116:1 Ka huithuinah ol te BOEIPA loh a yaak coeng dongah ka lungnah. 116:2 Kai taengla a hna a kaeng dongah ka hing tue khuiah ka khue ni. 116:3 Dueknah rhuihet neh saelkhui longcaek loh kai n'caeng. Citcai loh kai m'hmuh tih kothae loh m'vuei. 116:4 Te vaengah, “Aw BOEIPA ka hinglu he poenghal sak lah,” tila BOEIPA ming te ka khue. 116:5 Lungvatnah BOEIPA tah dueng tih mamih kah Pathen loh a haidam. 116:6 BOEIPA loh hlangyoe a ngaithuen. Ka tlayae vaengah kai n'khang. 116:7 BOEIPA loh nang ham a phai coeng dongah aw ka hinglu na ngolbuel la ha mael laeh. 116:8 Ka hinglu he dueknah lamkah, ka mik he mikphi lamkah, ka kho khaw thuihkoek dong lamkah nan pumcum sak. 116:9 Te dongah mulhing khohmuen kah BOEIPA mikhmuh ah ka pongpa van ni. 116:10 Kai loh, “Ka tholh tangkik,” ka ti vaengah pataeng ka tangnah. 116:11 Kai loh ka tamto vaengah, “Hlang boeih he laithae ni,” ka ti. 116:12 Kai ham a thennah boeih he BOEIPA taengah metlam ka thuung eh? 116:13 Khangnah boengloeng te ka pom vetih BOEIPA ming te ka khue ni. 116:14 BOEIPA taengkah ka olcaeng te a pilnam boeih kah mikhmuh ah ka thuung pawn ni. 116:15 A hlangcim rhoek kah dueknah he BOEIPA mikhmuh ah vang. 116:16 Aw BOEIPA, kai he na sal pai ni. Na salnu kah a ca, na sal kai he, ka kuelrhui lamloh nan hlam. 116:17 Nang taengah uemonah hmueih ka nawn vetih BOEIPA ming te ka khue ni. 116:18 BOEIPA taengkah ka olcaeng te a pilnam boeih kah mikhmuh ah, 116:19 BOEIPA im vongup neh Jerusalem nang khuiah ka thuung pawn ni. BOEIPA tah thangthen uh.