Library · hlt

Psalms 115

115:1 BOEIPA aw kaimih ham moenih. Kaimih ham pawt dae namah ming ham mah na sitlohnah, na uepomnah rhang neh thangpomnah te pae lah. 115:2 Ba dongah lae namtom rhoek loh, “A Pathen khaw melae me?,” a ti uh. 115:3 Tedae kaimih kah Pathen tah vaan ah om tih, amah loh a ngaih te boeih a saii. 115:4 Amih kah muei rhoek ngawntah cak neh sui neh hlang kut long ni a bi. 115:5 Amih te a ka om dae cal uh thai pawh. A mik te om dae hmuh uh thai pawh. 115:6 A hna te om dae ya uh pawh. A hnarhong te om dae him uh thai pawh. 115:7 A kut om dae yam thai pawh. A kho om dae cet uh thai pawh. A olrhong neh cai uh thai pawh. 115:8 Amih aka saii tih amih dongah aka pangtung rhoek boeih khaw amih bangla pawtlawt om uh. 115:9 Israel na BOEIPA dongah pangtung lah. Amah te amih kah bomkung neh photling ni. 115:10 Aaron imkhui nang BOEIPA dongah pangtung uh lah. Amah te amih kah bomkung neh photling ni. 115:11 BOEIPA aka rhih rhoek, BOEIPA dongah pangtung uh lah . Amah te amih kah bomkung neh photling ni. 115:12 BOEIPA loh mamih he n'ngaidam. Israel imkhui he yoethen a paek a paek vetih Aron imkhui khaw yoethen a paek ni. 115:13 BOEIPA aka rhih tanoe kangham taengah yoethen a paek ni. 115:14 BOEIPA loh nang neh na ca rhoek taengah hang koei saeh. 115:15 Vaan neh diklai aka saii BOEIPA loh nangmih yoethen m'paek coeng. 115:16 Vaan vaan rhoek BOEIPA hut dae diklai he hlanghing koca taengah a paek. 115:17 Aka duek rhoek neh tuihoeng la aka suntla boeih BOEIPA a thangthen uh moenih. 115:18 Tedae mamih loh tahae lamkah kumhal due khaw BOEIPA uem uh sih. BOEIPA thangthen uh.