Library · hlt

Psalms 118

118:1 Amah kah sitlohnah he kumhal duela a then dongah BOEIPA te uem uh lah. 118:2 A sitlohnah he kumhal due ham ni tila Israel loh thui laeh saeh. 118:3 A sitlohnah he kumhal due ham ni tila Aron imkhui loh thui uh laeh saeh. 118:4 A sitlohnah he kumhal due ham ni tila BOEIPA aka rhih rhoek loh thui uh laeh saeh. 118:5 Longcaek ah khaw BOEIPA ka khue tih BOEIPA loh a hoengpoeknah la kai n'doo. 118:6 BOEIPA he kai taengah a om dongah ka rhih mahpawh. Hlang loh kai taengah balae a saii thai eh? 118:7 BOEIPA tah kai taengah kai aka bom la a om dongah kai loh ka lunguet rhoek te ka sawt pueng ni. 118:8 Hlang dongah pangtung lakah BOEIPA dongah ying te then ngai. 118:9 Hlangcong dongah pangtung lakah BOEIPA dongah n'ying te then ngai. 118:10 Namtom boeih loh kai m'vael uh coeng dae amih te BOEIPA ming neh ka tloek uh. 118:11 Amih loh kai m'vael khaw m'vael uh ngawn dae BOEIPA ming neh ka tloek van. 118:12 Khoi bangla kai te m'ven uh cakhaw amih te BOEIPA ming neh ka tloek dongah hling hmai bangla thi uh. 118:13 Kai he cungku sak hamla nan tulh khaw nan tulh uh dae BOEIPA loh kai m'bom. 118:14 BOEIPA tah ka sarhi neh ka laa la om tih kai ham khangnah la om. 118:15 BOEIPA bantang ah thadueng aka khueh, hlang dueng kah dap khuiah tamlung ol neh khangnah om. 118:16 BOEIPA loh bantang kut a thueng. BOEIPA kah bantang kut loh caem a saii. 118:17 Ka duek pawt vetih ka hing pueng ni. Te dongah BOEIPA kah bibi te ka doek ni. 118:18 BOEIPA loh kai n'toel khaw n'toel coeng. Tedae dueknah dongah kai n'khueh moenih. 118:19 Kai ham duengnah vongka hang ong lah. Te long te ka kun saeh lamtah BOEIPA ka uem eh. 118:20 He tah BOEIPA kah vongka ni. Anih he aka dueng rhoek loh paan uh saeh. 118:21 Kai nan doo tih kai ham khangnah la na om dongah namah te ka uem ni. 118:22 Im aka sa rhoek loh a hnawt uh lungto te bangkil soi la pawk. 118:23 He he BOEIPA taeng lamkah ni halo. Te khaw mamih mikhmuh ah khobaerhambae la om. 118:24 He he BOEIPA kah a saii khohnin ni, omngaih uh sih lamtah amah dongah kohoe sak uh lah sih. 118:25 Aw BOEIPA n'khang laeh. Aw BOEIPA n'thaihtak sak laeh. 118:26 BOEIPA ming neh aka lo tah a yoethen pai. BOEIPA im lamkah nangmih te yoethen kam paek uh. 118:27 BOEIPA tah Pathen ni. Mamih taengah ha sae tih khotue hmueih te hmueihtuk ki dongah rhuivaeh neh a khih uh. 118:28 Nang tah ka Pathen ni. Te dongah ka Pathen namah te kang uem vetih kan pomsang ni. 118:29 A sitlohnah he kumhal due ham a then dongah BOEIPA te uem uh lah.