Library · hlt

Psalms 119

119:1 BOEIPA kah olkhueng bangla cuemthuek longpuei ah, aka pongpa tah a yoethen pai. 119:2 A olphong aka kueinah tih lungbuei boeih neh Amah aka tlap rhoek tah a yoethen pai. 119:3 A thae a hu khaw saii uh pawt tih BOEIPA kah longpuei ah pongpa uh. 119:4 Na olrhi te rhep ngaithuen sak ham namah loh na uen coeng. 119:5 Na oltlueh ngaithuen ham ka longpuei mah cikngae uh koinih. 119:6 Na olpaek boeih te ka paelki vaengah ka yak mahpawh. 119:7 Na duengnah dongkah tiktamnah te ka awt vanbangla thinko dueng neh nang kan uem eh. 119:8 Na oltlueh te ka ngaithuen vetih kai he nan hnoo tlaih mahpawh. 119:9 Na olka bangla khosak ham khaw cadong loh a caehlong te ba nen lae a saelh ? 119:10 Ka lungbuei boeih neh nang kan tlap dongah na olpaek lamloh kai nan palang sak moenih. 119:11 Nang taengah laihmuh pawt ham na olthui khaw ka lungbuei ah ka khoem coeng. 119:12 BOEIPA nang tah na yoethen pai. Na oltlueh te kai n'cang puei lah. 119:13 Na ka lamkah laitloeknah boeih te ka hmui ka lai neh ka tae eh. 119:14 Boeirhaeng cungkuem dongkah vanbangla na olphong longpuei dongah ka ngaingaih. 119:15 Na olrhi dongah ka lolmang tih na caehlong te ka paelki. 119:16 Na khosing dongah ka naepnoi tih, na ol te ka hnilh pawh. 119:17 Na sal ham he ham phai lah, ka hing vetih na ol ka ngaithuen bitni. 119:18 Na olkhueng dongah khobaerhambae te ka paelki van ham khaw ka mik ham phen lah. 119:19 Kai he diklai hmanah yinlai la ka om cakhaw na olpaek te kai taeng lamloh na thuh moenih. 119:20 Na laitloeknah dongah hnin takuem ah mueihuenah neh ka hinglu khaw mawth. 119:21 Na olpaek lamkah aka palang neh thaephoei thinlen rhoek khaw na tluung. 119:22 Na olphong te ka kueinah dongah kai sokah kokhahnah neh nueihbu he hang khoe lah. 119:23 Kai taengah mangpa rhoek loh ngolhlung uh tih ca uh cakhaw na sal tah na oltlueh dongah ni a. lolmang eh. 119:24 Na olphong tah ka hlahmaenah neh ka cilsuep hlang rhoek la om. 119:25 Ka hinglu he laipi khuiah kol cakhaw na ol bangla kai n'hing sak. 119:26 Ka longpuei he ka tae vaengah kai nan doo tih na oltlueh neh kai n'tukkil lah. 119:27 Na olrhi kah a longpuei te kai n'yakming lamtah namah kah khobaerhambae dongah ni ka lolmang eh. 119:28 Ka hinglu he pha-ueknah neh yut cakhaw na ol bangla kai n'thoh lah. 119:29 A honghi kah longpuei te kai lamloh hoep lamtah na olkhueng neh kai n'rhen lah. 119:30 Uepomnah longpuei te ka coelh tih na laitloeknah te ka mop. 119:31 BOEIPA nang kah olphong dongah ka balak tih kai nan yah sak pawh. 119:32 Ka lungbuei na dangka sak tih na olpaek longpuei ah ka yong. 119:33 BOEIPA aw na oltlueh longpuei te kai n'thuinuet lamtah a bawt due ka kueinah lah eh. 119:34 Kai n'yakming sak lamtah na olkhueng te ka kueinah eh. Te vaengah ka lungbuei boeih neh ka ngaithuen bitni. 119:35 Na olpaek a hawn dongah ka hmae vanbangla te nen te kai n'hoihaeng lah. 119:36 Mueluemnah ham pawt tih na olphong ham ka lungbuei ham maelh lah. 119:37 A poeyoek la aka hmu lamloh ka mik hang hoi lamtah na longpuei ah kai hing sak. 119:38 Nang hinyahnah ham te na sal taengah na olthui cak sak. 119:39 Namah kah laitloeknah he then tih kai loh ka rhih kokhahnah te m'poeng sak lah. 119:40 Na olrhi te ks hue coeng he, na duengnah dongah kai n'hing sak lah. 119:41 BOEIPA aw na olthui vanbangla na sitlohnah neh namah lamkah loeihnah he kai taengla pawk saeh. 119:42 Na ol dongah ka pangtung coeng dongah kai aka veet kah olka te ka doo van eh. 119:43 Na laitloeknah dongah ka ngaiuep vanbangla oltak ol he ka ka lamloh rhap huul boel mai. 119:44 Te dongah na olkhueng ni kumhal duela ka ngaithuen taitu yoeyah eh. 119:45 Na olrhi te ka toem dongah a mungkung la ka pongpa van bitni. 119:46 Na olphong te manghai rhoek taengah ka thui bal vetih ka yak mahpawh. 119:47 Na olpaek dongah ka naepnoi tih ka lungnah. 119:48 Na olpaek rhoek te ka kut ka phuel. Te te ka lungnah dongah na oltlueh dongah ni ka lolmang eh. 119:49 Kai nan ngaiuep sak ham khaw na sal taengkah ol he thoelh lah. 119:50 Te tah kai kah phacipphabaem vaengah ka hloephloeinah la om tih na olthui long ni kai n'hing sak. 119:51 Thinlen rhoek loh kai n'hnael uh cakhaw na olkhueng lamkah a voel la ka phael moenih. 119:52 BOEIPA aw khosuen lamkah na laitloeknah te ka poek tih ko ka hlawt. 119:53 Na olkhueng aka hnoo halang rhoek kongah a ling a lai loh kai n'do coeng. 119:54 Na oltlueh te kai ham tah ka lampahnah im ah laa la om. 119:55 BOEIPA aw, khoyin ah na ming ka poek tih na olkhueng te ka ngaithuen. 119:56 Te te kai taengah om coeng tih na olrhi te ka kueinah. 119:57 BOEIPA ka hamsum la na ol ngaithuen ham ni ka thui. 119:58 Lungbuei boeih neh na mikhmuh ah ka nue coeng tih na olthui bangla kai n'rhen lah. 119:59 Ka longpuei ka moeh tih na olphong taengla ka kho ka hoi. 119:60 Ka tawn uh vetih na olpaek ngaithuen ham ka uelh mahpawh. 119:61 Halang kah rhuihet loh kai n'hih cakhaw na olkhueng te ka hnilh mahpawh. 119:62 Na duengnah neh tiktamnah dongah nang uem ham khoyin pathung ah ka thoo. 119:63 Kai tah nang aka rhih tih na olrhi aka ngaithuen rhoek boeih kah a hui la ka om. 119:64 BOEIPA nang kah sitlohnah neh diklai khaw hah coeng tih na oltlueh neh kai n'tukkil lah. 119:65 Na ol bangla BOEIPA na sal taengah a then na saii coeng. 119:66 Na olpaek te ka tangnah dongah, omih thennah neh mingnah te kai n'tukkil lah. 119:67 Ka poeih uh hlanah ka taengphael cakhaw na olthui ni ka ngaithuen coeng. 119:68 Na then tih na voelphoeng dongah na oltlueh te kai n'tukkil lah. 119:69 A honghi kah thinlen loh kai n'coe thil cakhaw ka lungbuei boeih neh na olrhi ka kueinah coeng. 119:70 Amih lungbuei te maehtha bangla moelh cakhaw kai tah na olkhueng nen ni ka naepnoi. 119:71 Kai ham tah m'phaep te khaw hoeikhang mai. Te nen ni na oltlueh te n'tukkil eh. 119:72 Na ka dongkah olkhueng te kai ham tah sui neh ngun thawngkhat lakah then. 119:73 Na olpaek ka awt ham ni na kut loh kai n'saii tih, kai m'picai tih kai nan yakming sak. 119:74 Na ol te ka ngaiuep dongah nang aka rhih rhoek loh kai m'hmuh uh vaengah a kohoe uh. 119:75 BOEIPA nang kah laitloeknah tah duengnah la om tih uepomnah neh kai nan phaep te ka ming. 119:76 Na sal taengkah na olthui bangla na sitlohnah tah kai aka hloep la om laeh saeh. 119:77 Na haidamnah te kai taengla ha pawk saeh lamtah na olkhueng te ka hlahmaenah la ka hing puei eh. 119:78 Thinlen rhoek loh a honghi neh kai n'khun sak uh te yak uh saeh. Kai tah na olrhi dongah ni ka lolmang eh. 119:79 Nang aka rhih tih na olphong aka ming la aka ming rhoek tah kai taengla ha mael uh saeh. 119:80 Kai lungbuei he na oltlueh dongah cuemthuek la a om daengah ni ka yah pawt eh. 119:81 Namah kah loeihnah dongah ka hinglu a khum vaengah na ol dongah ka ngaiuep. 119:82 Na olthui te ka mik la kha coeng tih, “Me vaengah nim kai nan hloep eh?” ka ti. 119:83 Hmaikhu dongkah tuitang bangla ka om dae na oltlueh te ka hnilh moenih. 119:84 Na sal kah khohnin tah mebang nim? Kai aka hloem rhoek soah me vaengah nim laitloeknah na saii ve? 119:85 Thinlen rhoek loh kai hamla rhom a vueh uh te na olkhueng moenih. 119:86 Na olpaek boeih he uepomnah ni, a poeyoek la kai n'hloem he kai m'bom lah. 119:87 Pacilpahnai la diklai lamloh kai n'khah uh. Tedae na olrhi te ka hnoo moenih. 119:88 Na sitlohnah dongah ka hing vetih na ka dongkah olphong te ka ngaithuen bitni. 119:89 BOEIPA namah kah ol tah vaan ah kumhal duela pai. 119:90 Na uepomnah tah diklai a soepboe lamloh thawnpuei neh cadilcahma duela cak. 119:91 Na laitloeknah bangla na sal boeih ham khaw tahae khohnin due cak. 119:92 Na olkhueng te ka hlahmaenah pawt koinih kamah kah phacipphabaem dongah ni ka paltham eh. 119:93 Te rhoek rhangneh kai nan hing sak dongah na olrhi te kumhal duela ka hnilh mahpawh. 119:94 Kai he namah ham ni. Na olrhi te ka toem dongah kai he n'khang lah. 119:95 Kai phae ham halang rhoek loh kai n'lamtawn uh cakhaw na olphong ni ka yakming eh. 119:96 Boeih a soepnah he a bawtnah om dae na olpaek tah dangka tangkik tila ka hmuh. 119:97 Na olkhueng te hnin takuem ka thuepnah ham bahoeng ka lungnah. 119:98 Na olpaek te kai taengah kumhal duela om tih ka thunkha rhoek lakah kai n'cueih sak. 119:99 Na laipainah te ka thuepnah coeng dongah kai aka tukkil boeih lakah n'cangbam. 119:100 Na olrhi te ka kueinah dongah patong rhoek lakah khaw ka yakming. 119:101 Boethae caehlong boeih lamloh ka kho ka tuem daengah ni na ol te ka ngaithuen thai eh. 119:102 Namah loh kai nan thuinuet coeng dongah na laitloeknah lamloh ka phaelh moenih. 119:103 Na olthui he ka dang dong neh ka ka dongah khoitui lakah khaw bahoeng didip. 119:104 Na olrhi lamloh ka yakming tangloeng dongah laithae kah caehlong tah boeih ka thiinah. 119:105 Na ol tah ka kho ham hmaithoi neh ka hawn ham vangnah la om. 119:106 Na duengnah dongkah laitloeknah te ngaithuen hamla ka toemngam tih ka cak sak coeng. 119:107 Mat ka phaep uh vaengah he BOEIPA aw na ol bangla kai n'hing sak. 119:108 BOEIPA aw ka ka dongkah kothoh he doe mai lamtah na laitloeknah te kai n'tukkil lah. 119:109 Ka hinglu he ka kut khuiah om taitu dae na olkhueng te ka hnilh mahpawh. 119:110 Halang rhoek loh kai hamla pael phoh cakhaw na olrhi lamloh kho ka hmang moenih. 119:111 Kumhal due ka lungbuei omngaihnah ham na olphong te ka pang coeng. 119:112 Na oltloek te kumhal a bawt bawt duela vai ham ni ka lungbuei ka maelh. 119:113 Cikcoknah te ka hmuhuet tih, na olkhueng te ka lungnah. 119:114 Ka hlipyingnah neh ka photling tah namah tih, na ol dongah ka ngaiuep. 119:115 Thaehuet rhoek te kai lamloh nong lamtah ka Pathen kah olpaek te ka kueinah eh. 119:116 Na olthui bangla kai nan talong daengah ni ka hing vetih ka ngaiuepnah lamloh kai nan yah sak pawt eh. 119:117 Kai nan duel daengah ni ka daem vetih na oltloeh te ka mang thil taitu eh. 119:118 Amih kah a huep he a honghi la a om dongah na oltlueh lamloh aka palang rhoek boeih te suntlae. 119:119 Diklai halang boeih te aek la na kangkuen sak tangloeng dongah ni na olphong te ka lungnah. 119:120 Na taengah birhihnah neh ka saa khaw poeng hu tih na laitloeknah te ka rhih. 119:121 Tiktamnah neh duengnah ka saii dongah kai aka hnaemtaek rhoek taengla kai nan voei pawh. 119:122 Na sal kah a then te rhikhang lamtah thinlen loh kai hnaemtaek boel saeh. 119:123 Namah kah khangnah dong neh na duengnah olthui dongah ka mik kha coeng. 119:124 Na sitlohnah bangla na sal taengah saii lamtah na oltlueh te kai n'tukkil lah. 119:125 Na sal kai he kamah nan yakming sak daengah ni na olphong te ka ming eh. 119:126 BOEIPA aw, na olkhueng a phae uh dongah saii ham khaw a tue a pha coeng. 119:127 Te dongah na olpaek tah sui lakah khaw suicilh lakah khaw ka lungnah. 119:128 Olrhi boeih he boeih ka dueng sak tangloeng dongah laithae caehlong tah boeih ka thiinah. 119:129 Na olphong rhoek he khobaerhambae tangloeng dongah ni ka hinglu khaw a kueinah. 119:130 Na ol kah khohue loh a sae vaengah hlangyoe rhoek pataeng a yakming sak. 119:131 Ka ka te ka ang tih na olpaek te mam ham ka rhingda. 119:132 Na ming aka lungnah rhoek taengkah laitloeknah vanbangla kai taengla ha hooi lamtah kai n'rhen lah. 119:133 Na olthui bangla ka khokan he cikngae sak lamtah boethae boeih loh kai soah taemrhai boel saeh. 119:134 Hlang kah hnaemtaeknah lamloh kai n'lat lamtah na olrhi te ka ngaithuen eh. 119:135 Na maelhmai te na sal taengah sae sak lamtah na oltlueh te kai n'cang puei lah. 119:136 Na olkhueng te a ngaithuen uh pawt dongah ka mik dongkah sokca tui loh long. 119:137 BOEIPA nang na dueng dongah na laitloeknah khaw thuem. 119:138 Na olphong kah duengnah neh uepomnah tangkik te khaw na uen. 119:139 Ka rhal rhoek loh na ol a hnilh uh dongah ka thatlainah loh kamah n'thah. 119:140 Na olthui he a cae payik coeng dongah na sal long khaw a lungnah. 119:141 Kai canoi dongah n'hnaep cakhaw na olrhi te ka hnilh moenih. 119:142 Na duengnah tah kumhal ham duengnah la om tih na olkhueng khaw oltak la om. 119:143 Rhal neh a caeknah loh kai soah ha thoeng dae na olpaek tah kai kah hlahmaenah la om. 119:144 Na olphong kah duengnah te kumhal duela kai m'ming sak lamtah ka hing puei eh. 119:145 Lungbuei boeih neh kang khue vaengah kai n'doo lamtah BOEIPA nang kah oltlueh te ka kueinah eh. 119:146 Nang kang khue vaengah kai n'khang lamtah na olphong te ka ngaithuen eh. 119:147 Hlaemhmah hlanah ka kun tih ka pang he na ol dongkah na ol te ni ka ngaiuep. 119:148 Na olthui dongah lolmang hamla hlaemhmah ah ka mik ca. 119:149 Na sitlohnah bangla ka ol hnatun lamtah BOEIPA aw na laitloeknah bangla kai n'hing sak. 119:150 Khonuen rhamtat aka hloem rhoek te capit uh cakhaw na olkhueng lamloh lakhla uh. 119:151 BOEIPA namah na yoei dongah na olpaek boeih khaw oltak la om. 119:152 Na olphong lamloh kumhal duela na suen te hlamat ah ni ka ming coeng. 119:153 Na olkhueng te ka hnilh pawt dongah kai kah phacipphabaem he hmu lamtah kai n'pumcum sak lah. 119:154 Kai kah tuituknah te rhoe laeh, na olthui bangla kai n'tlan lamtah kai n'hing sak lah. 119:155 Halang taeng lamloh khangnah a hla te khaw na oltlueh a toem uh pawt dongah ni. 119:156 Na haidamnah he a len dongah BOEIPA aw na laitloeknah bangla kai n'hing sak. 119:157 Kai aka hloem rhoek neh ka rhal khaw yet dae na olphong lamloh ka phaelh moenih. 119:158 Na olthui a ngaithuen uh pawt dongah hnukpoh te ka hmuh vaengah ka ko-oek. 119:159 Na olrhi ka lungnah te hmu lamtah BOEIPA aw na sitlohnah bangla kai n'hing sak. 119:160 Na ol tah oltak boeilu la om tih na duengnah dongkah laitloeknah boeih kumhal duela cak. 119:161 Mangpa rhoek loh lunglilungla la kai n'hloem uh cakhaw na ol phoeikah na ol dongkah ni ka lungbuei loh a rhih. 119:162 Na olthui dongah tah kutbuem muep aka dang bangla ka ngaingaih. 119:163 Na olkhueng ka lungnah dongah laithae he ka thiinah tih ka tuei. 119:164 Na duengnah dongkah laitloeknah dongah namah te hnin at ah voeirhih kan thangthen. 119:165 Na olkhueng aka lungnah rhoek ham ngaimongnah yet tih amih taengah hmuitoel khaw om pawh. 119:166 Namah kah khangnah te ka lamso dongah BOEIPA aw na olpaek te ka vai. 119:167 Na olphong te muep ka lungnah dongah ka hinglu te a ngaithuen. 119:168 Namah hmaikah ka longpuei boeih ham na olrhi neh na olphong ni ka ngaithuen. 119:169 Ka tamlung loh BOEIPA namah mikhmuh la ha pawk saeh lamtah na ol bangla kai n'yakming sak. 119:170 Kai kah lungmacil loh na mikhmuh la ha pawk saeh lamtah na olthui bangla kai n'huul lah. 119:171 Na oltlueh te kai nan cang puei dongah ka hmuilai kah koehnah he phuet saeh. 119:172 Namah kah duengnah olpaek boeih dongah na olthui te ka hmuilai loh doo saeh. 119:173 Na olrhi te ka coelh coeng dongah na kut te kaiaka bom la om saeh. 119:174 BOEIPA nang kah khangnah te ka hue dongah na olkhueng ni ka hlahmaenah coeng. 119:175 Ka hinglu he a hing daengah ni nang n'thangthen vetih na laitloeknah loh kai n'bom eh. 119:176 Tu bangla kho ka hmang tih ka milh dae, na sal he na olpaek ka hnilh pawt dongah n'tlap lah.