Library · hlt

Psalms 144

144:1 David kah Caemtloek ham ka kutdawn neh caemrhal ham ka kut aka cang puei, ka lungpang BOEIPA tah a yoethen pai saeh. 144:2 Ka sitlohnah neh ka rhalvong, ka imsang neh kai ham kai aka hlawt ka photling, ka hmuiah ka pilnam aka hnaa amah dongah ni ka ying. 144:3 BOEIPA aw hlang te metlam nim na ming tih amah hlanghing capa te amah la na moeh. 144:4 Hlang he a hohing la lutlat tih a khohnin khaw mueihlip bangla khum. 144:5 BOEIPA namah kah vaan ke koisu lamtah ha rhum laeh. Tlang ke puei lamtah khuu uh kangna saeh. 144:6 Rhaek daeh sak lamtah amih te taekyak lah . Na thaltang dong lamtah amih te khawkkhek lah . 144:7 Hmuensang lamkah na kut yueng lamtah kai m'paco lah. Tui len lamkah khaw, kholong hlang kah kut lamlong khaw kai n'huul lah. 144:8 Amih ka te a poeyoek la cal uh tih a bantang bantang ah laithae om. 144:9 Pathen namah taengah laa thai ka sa saeh lamtah namah te thangpa parha neh kan tingtoeng eh. 144:10 Manghai rhoek te loeihnah aka pae tih a sal David te boethae cunghang lamloh aka paco. 144:11 Kai he m'paco lamtah kholong ca rhoek kut lamloh kai n'huul lah. Amih ka te a poeyoek la cal tih a bantang bantang ah a honghi kak la om. 144:12 Kaimih koca rhoek tah a camoe vaengah mupoe bangla rhoeng. Ka tu rhoek te bawkim muei la a saek rhungsut bangla om uh. 144:13 Ka thaidi loh a com a luem lamkah te a khawk la a dang. Ka khohmuen ah ka boiva loh thawt tih pungtai. 144:14 Ka boeihlum aka tloeng khaw puut pawt tih khumpael pawh. Te dongah henah loh kaimih toltung ah om pawh. 144:15 Amah kah pilnam te tah a yoethen pai. BOEIPA te a Pathen la aka khueh pilnam te tah a yoethen pai.