Library · hlt

Psalms 145

145:1 David kah Koehnah Kai kah Pathen Manghai namah te kan pomsang saeh lamtah, kumhal duela na ming ni ka uem yoeyah eh. 145:2 Khohnin takuem ah nang kang uem vetih na ming te kumhal duela ka thangthen yoeyah ni. 145:3 BOEIPA tah len tih muep thangthen pai saeh. A lennah te khenah om pawh. 145:4 Cadilcahm a kah cadilcahma duela na bibi te a domyok sak vetih na thayung thamal te a thui uh ni. 145:5 Na rhuepomnah, na thangpomnah, na mueithennah neh na ol khobaerhambae ni ka lolmang puei eh. 145:6 Te dongah na tlungalnah rhih om te a thui uh vaengah na lennah phoeikah na lennah te ka tae eh. 145:7 Na thennah muep poekkoepnah te a phuet uh vetih, na duengnah te a tamhoe puei uh ni. 145:8 Lungvatnah neh thinphoei BOEIPA tah a thintoek a ueh dongah a sitlohnah khaw len. 145:9 BOEIPA tah a cungkuem taengah then tih a haidamnah khaw a khoboe boeih soah tueng. 145:10 Na bibi boeih loh BOEIPA namah n'uem uh vetih na hlangcim rhoek loh namah n'koeh uh ni. 145:11 Na ram kah thangpomnah a ti uh vetih na thayung thamal te a thui uh ni. 145:12 A thayung thamal neh a ram rhuepomnah dongkah thangpomnah hlang koca rhoek taengah ming sak ham ni. 145:13 Na ram khaw kumhal boeih kah ram la om tih ni na khohung khaw cadilcahma phoeikah cadilcahma boeih duela cak. 145:14 Aka cungku boeih te BOEIPA loh a talong tih aka duengyai boeih te a sambai. 145:15 Mik boeih loh namah te n'lamso uh tih amah tue vaengah a caak te amih taengah na paek. 145:16 Na kut te na hlam tih mulhing boeih taengah kolonah na cung sak. 145:17 A longpuei boeih dongah BOEIPA tah dueng tih a bibi boeih dongah cim. 145:18 Amah aka khue boeih taeng neh oltak la amah aka khue boeih taengah BOEIPA he a yoei pah. 145:19 Amah aka rhih rhoek kah kolonah te a saii pah tih amih kah a pang te a yaak dongah amih te a khang. 145:20 Amah aka lungnah rhoek boeih te BOEIPA loh a ngaithuen. Tedae halang rhoek boeih te tah a mitmoeng sak ni. 145:21 BOEIPA koehnah ka ka loh thui saeh lamtah pumsa boeih loh a ming cim te kumhal duela yoethen pae yoeyah saeh.