Library · hlt

Psalms 148

148:1 BOEIPA thangthen sak. BOEIPA te vaan lamloh thangthen sak, amah te hmuensang ah thangthen sak. 148:2 A puencawn boeih loh amah te thangthen uh. A caempuei khuikah a caempuei boeih loh amah te thangthen uh. 148:3 Khomik neh hla loh amah te thangthen lah. Vangnah aisi boeih loh amah te thangthen lah. 148:4 Vaan phoeikah vaan, vaan dong sokah tui rhoek loh amah te thangthen uh. 148:5 Amah loh a uen tih a suen dongah BOEIPA ming te thangthen saeh. 148:6 Te rhoek kumhal duela a cak sak yoeyah dongah oltlueh he a paek phoeiah tah khum mahpawh. 148:7 Diklai lamkah tuihnam rhoek neh tuidung boeih loh BOEIPA te thangthen lah. 148:8 Hmai neh rhael, vuelsong neh tuikhu, hlipuei khohli loh a ol a vai. 148:9 Tlang neh som boeih, thing thaih neh lamphai thing boeih, 148:10 mulhing neh rhamsa boeih, rhulcai neh phae aka khueh vaa boeih, 148:11 diklai manghai rhoek neh namtu rhoek boeih, mangpa rhoek neh diklai laitloek boeih, 148:12 tongpang rhoek neh oila rhoek khaw, patong rhoek neh camoe rhoek loh BOEIPA ming te thangthen saeh. 148:13 Diklai hman neh vaan kah a mueithennah ham amah long ni a ming a pomdoep. 148:14 Te dongah a pilnam kah ki, a hlangcim boeih neh a hui pilnam Israel ca rhoek kah koehnah te a pomsang coeng. BOEIPA te thangthen uh.