Psalms 37
37:1 David kah Thaehuet rhoek dongah sai boel lamtah dumlai aka saii taengah thatlai boeh.
37:2 Amih te sulr ham bangla pahoi a ah uh vetih bael hing bangla hoo ni.
37:3 BOEIPA dongah aka pangtung tih a then aka saii khohmuen ah kho a sa tah uepomnah neh a luem sak.
37:4 BOEIPA dongah pangdok lamtah na lungbuei kah a huithuinah te nang ham m'paek bitni.
37:5 Na longpuei te BOEIPA taengah hal lamtah amah dongah pangtung lah. Te vaengah amah loh a saii bitni.
37:6 Te dongah na duengnah te khosae bangla, na tiktamnah khaw khothun bangla sae sak.
37:7 BOEIPA taengah duem om lamtah amah te rhingoel lah. Tangkhuepnah aka saii hlang loh a longpuei a thaihtak sak vaengah sai boeh.
37:8 Thintoek te rhael, na sue khaw hnoo lamtah sai boeh. Thintoek he thaehuet bueng lam ni a pawk.
37:9 Thaehuet rhoek te moeng uh vetih a BOEIPA aka lamtawn rhoek loh khohmuen a pang uh ni.
37:10 Tedae kolkalh ah om vetih halang te om mahpawh. A hmuen ham khaw na yakming pah suidae amah om hae mahpawh.
37:11 Tedae kodo rhoek tah khohmuen a pang uh vetih ngaimongnah cungkuem dongah ngailaem uh ni.
37:12 Halang loh hlang dueng te a mangtaeng tih a taengah a no a tah thil.
37:13 A khohnin halo te a hmuh dongah anih te Boeipa loh a nueih thil.
37:14 Halang rhoek loh cunghang a yueh uh tih mangdaeng cungku sak ham neh a thuem longpuei kah khodaeng ngawn ham lii a phuk uh.
37:15 Tedae amih kah cunghang loh amamih kah lungbuei te a hun pah vetih a liva khaw tlawt ni.
37:16 Aka dueng kah a yol a khueh te halang kah muep a tawn lakah then.
37:17 Halang rhoek kah a ban te khaem vetih hlang dueng te BOEIPA loh a talong ni.
37:18 Cuemthuek rhoek kah khohnin te BOEIPA loh a ming pah dongah, a rho khaw kumhal duela om ni.
37:19 Yoethaenah tue vaengah yak uh pawt vetih lamlum tue vaengah hah uh ni.
37:20 Tedae halang rhoek te milh uh vetih BOEIPA kah thunkha thunhling te rhamtlim paithen bangla hmata ni. Hmaikhu bangla khumpael ni.
37:21 Halang loh a pu vaengah thuung pawt dae hlang dueng long tah a rhen tih a paek.
37:22 Amah kah yoethen a paek rhoek loh khohmuen a pang uh tih a tap rhoek te moeng uh ni.
37:23 BOEIPA loh hlang kah khokan a cikngae sak tih a longpuei khaw a ngaih pah.
37:24 BOEIPA loh a kut a talong pah dongah, cungku cakhaw hlah mahpawh.
37:25 Camoe la ka om tih ka patong coeng dae hlang dueng a hnoo dongah a tiingan loh buh a bih te ka hmuh noek moenih.
37:26 Hnin takuem a moeihoeih tih cang pu a hlah dongah a tiingan kah yoethennah la poeh.
37:27 A thae te nong tak lamtah a then saii lah. Te daengah ni kumhal duela kho na sak eh.
37:28 BOEIPA loh tiktamnah a ngaih dongah a hlangcim rhoek a hnoo mueh la kumhal due a ngaithuen. Tedae halang kah tiingan te a khoe.
37:29 Hlang dueng loh khohmuen a pang vetih a khuiah yoeyah la kho a sak ni.
37:30 Hlang dueng kah a ka loh cueihnah a thuep tih a lai loh tiktamnah a thui.
37:31 A Pathen kah olkhueng loh a lungbuei ah hing tih a khokan khaw paloe pawh.
37:32 Halang loh hlang dueng te a tawt tih ngawn ham a tlap.
37:33 BOEIPA loh hlang dueng te halang kut ah hnoo pawt vetih laitloek vaengah anih te boe sak mahpawh.
37:34 BOEIPA te lamtawn lamtah a long te vai. Te vaengah khohmuen pang sak ham nang n'pomsang vetih halang rhoek a phae te na hmuh ni.
37:35 Halang hlanghaeng ka hmuh vaengah thinghing mupoe bangla daih.
37:36 Tedae a khumpael vanneh anih te vik om voelpawh. Anih te ka tlap van dae ka hmu voelpawh.
37:37 Ngaimong hlang ham khohmai a om pueng dongah a cuemthuek ke dawn lamtah a thuem ke hmu lah.
37:38 Tedae boekoek rhoek te mitmoeng uh vetih halang rhoek kah hmailong khaw boeih a khat ni.
37:39 Te dongah hlang dueng rhoek kah loeihnah he BOEIPA taengkah la om tih citcai tue vaengah amih ham lunghim la om.
37:40 Te dongah BOEIPA loh amih te a bom tih a hlawt. BOEIPA ah a ying uh dongah halang kut lamkah amih te a hlawt tih a khang.