Library · hlt

Psalms 60

60:1 Aramnaharaim neh Aramzobah te a hnueih phoeiah Joab ha bal tih kolrhawk ah Edom thawng hlai nit a ngawn vaengkah a tukkil te aka mawt ham David kah Olphong Tuilipai laa Pathen aw, kaimih he nan hlahpham tih, na thintoek ah kaimih nan phaek. Kaimih he koep m'mael puei lah. 60:2 Diklai na hinghuen tih phak na boe. A tuen vaengkah a hma te hoeih sak lah. 60:3 Na pilnam te mangkhak la na hmuh tih ngaengainah misurtui te kaimih nan tul. 60:4 Nang aka rhih ham tah, tiktam hmai la rhaelrham saeh tila rholik na thoh pah. Selah 60:5 Na lungnah rhoek te na bantang neh khang lamtah pumcum uh van saeh. Te dongah kaimih he n'doo lamtah kamah khaw n'doo mai. 60:6 Pathen loh a hmuencim lamkah, “Ka sundaep vetih, Shekhem te ka boe phoeiah Sukkoth kol te ka suem ni. 60:7 Gilead he kai kah tih, Manasseh khaw kamah kah. Ephraim khaw ka lu kah lunghim tih, Judah khaw ka taem. 60:8 Moab tah kai kah tuihluknah am ni. Edom soah ka khokhom ka voeih tih Philistia te ka yuhui thil,” a ti. 60:9 Vongup khopuei la ulong kai n'khuen eh ? Edom la ulong kai m'mawt eh ? 60:10 Pathen nang loh kaimih nan hlahpham pawt tih Pathen namah te kaimih kah caempuei rhoek taengla na pawk moenih a? 60:11 Hlang kah loeihnah a poeyoek la a om dongah rhal taengah khaw kai he bomnah m'pae lah. 60:12 Pathen neh caem ka tloek rhoi vetih ka rhal ka suntlae ni.