Library · hlt

Psalms 61

61:1 Rhotoeng neh aka mawt ham David kah Pathen aw ka tamlung he ya lamtah ka thangthuinah he hnatung lah. 61:2 Nang te Diklai a bawt lamkah kan khue. Ka lungbuei a rhae vaengah kamah lakah aka sang lungpang taengla kai nan mawt. 61:3 Kai ham tah hlipyingnah neh thunkha hmai ah sarhi rhaltoengim la na om. 61:4 Na dap khuiah kumhal ka bakuep vetih na phae hlip ah ka ying ni. Selah 61:5 Pathen namah loh ka olcaeng te na yaak dongah na ming aka rhih tah rho na paek. 61:6 Manghai kah a tue khohnin te puh sak lamtah a kum khaw cadilcahma duela nguel sak. 61:7 Sitlohnah Pathen hmai ah kumhal khosa saeh lamtah a khueh oltak loh anih te kueinah saeh. 61:8 Khohnin, khohnin ah ka olcaeng te thuung ham na ming ka tingtoeng yoeyah.