Library · hlt

Psalms 73

73:1 Asaph kah Tingtoenglung Thinko aka caih Israel taengah Pathen tah then taktak. 73:2 Tedae kai tah ka kho he bet bung khaw bung bangla, ka khokan paloe khaw paloe pawt bangla ka om. 73:3 Halang rhoek loh ngaimongnah neh a thangthen uh te ka hmuh vaengah ka thatlai coeng. 73:4 Amih tah dueknah dongah thuengthuelnah om pawt tih, a pumtak khaw len. 73:5 hlanghing kah thakthaenah loh amih te nan pawt tih hlanghing taengkah lucik khaw ya uh pawh. 73:6 Te dongah hoemnah te amih kah oihnun la om tih, a kuthlahnah hnisui a khuk uh. 73:7 A mik tha te coe tih, a thinko ngaihlihnah loh vikvuek uh. 73:8 Boethae neh palawm uh tih cal uh. Hnaemtaeknah neh a sang la cal uh. 73:9 A ka te vaan ah a tael dae a lai loh diklai ah cet. 73:10 Te dongah a pilnam loh hela ha mael ha mael tih khuengrhueng tui a yawn uh. 73:11 Te vaengah, “Pathen loh metlam a ming tih, Khohni taengah lungming khaw om van nim,” a ti uh. 73:12 Amih halang rhoek pataeng kumhal ah a khuehtawn loh thayoeituipan la a rhoeng pah daeta ke. 73:13 A poeyoek la ka thinko ka saelh tih, cimnah neh ka kut ka silh dae. 73:14 Tedae hnin takuem lucik neh ka om tih mincang takuem ah kai taengah toelthamnah ha om. 73:15 Te tlam te ka tae koinih na ca rhoek kah thawnpuei te kan hnukpoh tak ve ka ti. 73:16 Hekah he ming ham ka moeh dae ka mik ah thakthaenah la om. 73:17 Pathen kah rhokso khuila ka kun daengah amih kah hmailong te ka yakming. 73:18 Amih te long hnal ah na khueh tih pocinah la na cungku sak taktak. 73:19 Mikhaptok ah mueirhih loh imsuep neh a thup uh tih a cing te metlam a om uh. 73:20 Haenghang hnukah mueimang bangla ka Boeipa loh amih kah mueihlip a haenghang vaengah hnael pah. 73:21 Ka thinko loh khikhi hal tih ka hmuet a phawt vaengah. 73:22 Kai loh ka kotalh tih na hmaiah rhamsa bangla ka om khaw ka ming pawh. 73:23 Tedae kai tah nang taengah ka om taitu tih ka bantang kut nan tuuk. 73:24 Na cilsuep neh kai nan mawt tih thangpomnah hnukah kai nan khoem ni. 73:25 Vaan dongah kai ham unim aka om. Tedae namah taengah ka om atah diklai ah ba khaw ka ngaih pawh. 73:26 Ka pumsa neh ka thinko loh yawk mai suidae kumhal ah ka thinko kah lungpang neh ka hamsum la Pathen om. 73:27 Namah lamkah a hlahloei loh a milh uh vaengah, nang taengah aka cukhalh boeih te na biit taktak coeng he. 73:28 Tedae kai loh kamah ham Pathen vang te ka kai. Na bitat cungkuem thui hamla ka hlipyingnah ka Boeipa Yahovah taengah a then ka khueh.