Library · hlt

Psalms 74

74:1 Asaph kah Hlohlai Pathen aw ba aih. nim yoeyah la na hlahpham aih.? Na thintoek loh na rhamtlim kah boiva taengah mawngmawng khuu. 74:2 Hlamat kah na lai na hlangboel khaw, na rho la na tlan koca khaw, kho na sak thil Zion tlang te khaw poek lah. 74:3 Hmuen cim khuikah thunkha rhoek te yoeyah pocinah neh boeih talh ham na khokan te pomsang lah. 74:4 Nang kah tingtunnah khui ah nang aka daengdaeh rhoek te kawk uh tih miknoek khaw amamih kah miknoek te a khueh uh. 74:5 Thing ding ah a so la hai aka thueng bangla tueng. 74:6 Tedae hai neh a thuk a thingthuk boeih khaw thilung neh nawn a phop uh. 74:7 Na rhokso te hmai neh a hoeh uh tih na ming aka phuei tolhmuen te diklai duela a poeih uh. 74:8 A lungbuei nen tah, “Rhenten m'phae coeng,” a ti uh tih, diklai ah Pathen kah tingtunnah boeih te a hoeh uh. 74:9 Mahmih kah miknoek khaw m'hmu uh pawh. Tonghm a om voelpawt tih mamih khuiah aka ming thai he mevaeng hil nim a om pawt ve? 74:10 Pathen tah me hil nim rhal loh a veet vetih thunkha loh na ming he a yoeyah la a tlaitlaek ve? 74:11 Balae tih na kut na yueh. Na rhang kah na oltlueh khui lamloh na bantang kut neh khap kanoek saw. 74:12 Tedae Pathen he hlamat lamkah diklai tollung ah khangnah aka saii ka manghai pai ni. 74:13 Namah loh tuitunli te na sarhi neh na kak sak tih tui tuihnam rhoek kah a lu te na phop pah. 74:14 Nang loh Leviathan kah a lu te na neet tih kohong ham neh pilnam ham caak la na paek. 74:15 Namah loh tuisih soklong khaw na hep tih tuiva puei khaw na haang sak. 74:16 Khothaih khaw namah kah, khoyin khaw namah kah, vangnah neh khomik khaw namah loh na soep na boe. 74:17 Namah loh diklai kah rhilung boeih na suem tih khohal neh sikca khaw namah loh na hlinsai. 74:18 BOEIPA aka veet thunkha neh na ming yah aka bai pilnam ang he poek lah. 74:19 Na vahui kah a hinglu te satlung taengla na pae pawt tih na mangdaeng rhoek kah a hingnah khaw a yoeyah la na hnilh moenih. 74:20 Kuthlahnah rhamtlim te diklai khohmuep khuiah a baetawt dongah paipi te paelki laeh. 74:21 Mangdaeng hmaithae khaw hlanghnaep pahnap la mael boel saeh lamtah na ming te khodaeng rhoek loh thangthen uh saeh. 74:22 Pathen aw thoo laeh. Namah kah tuituknah khaw oelh van laeh. Hlang ang loh hnin takuem nang n'kokhahnah ke thoelh laeh. 74:23 Nang aka daengdaeh rhoek kah ol te na hnilh moenih. Nang aka tlai thil rhoek kah longlonah tah cet yoeyah.