Library · hlt

Psalms 80

80:1 Olphong Tuilipai aka mawt ham Asaph kah Tingtoenglung Israel aka dawn loh hnatun lah. Boiva bangla Joseph aka hmaithawn tih cherubim aka ngol loh ha sae lah. 80:2 Ephraim, Benjamin neh Manasseh mikhmuh ah na thayung thamal te huel lamtah, kaimih kah khangnah ham halo lah. 80:3 Pathen aw kaimih nan lat tih, na maelhmai a sae daengah ni ka daem uh eh. 80:4 Caempuei Pathen BOEIPA me hil nim, na pilnam kah thangthuinah te na khuu thil eh? 80:5 Amih te mikphi buh na cah tih baelpuei mikphi na tul. 80:6 Ka imben rhoek ham olpungkacan la kaimih nan khueh tih ka thunkha rhoek loh n'tamdaeng uh. 80:7 Caempuei Pathen aw kaimih nan lat tih na maelhmai a sae daengah ni ka daem uh eh. 80:8 Egypt lamkah nang khuen misur te namtom na haek phoeiah na phung. 80:9 A mikhmuh ah hmuen na saelh pah tih a yung a hlak dongah khohmuen ah baetawt. 80:10 A hlip loh tlang tom a dah tih a hlaeng loh lamphai thingnu a yam thil. 80:11 A pae loh tuitunli duela, a dawn long khaw tuiva duela a voeih. 80:12 A vongtung te a ba ham nim na phae tih long kah aka pongpa boeih loh a bit uh? 80:13 Duup lamkah okngal loh a thoe tih kohong kah satlung loh a luem thil. 80:14 Caempuei Pathen aw, ha mael laeh. Misur he vaan lamloh paelki lah, so lamtah hip lah. 80:15 Na bantang kut neh a yung te na phung tih namah ham a ca na hlul sak. 80:16 Hmai neh a hoeh tih a vung. Na mikhmuh kah tluungnah dongah milh uh. 80:17 Na bantang hlang so neh namah ham na thoh hlang capa soah na kut tloeng lah. 80:18 Te daengah ni nang taeng lamkah ka balkhong uh pawt eh. Kaimih he nan hlun daengah ni na ming te kang khue uh eh. 80:19 Caempuei Pathen Yahweh kaimih nan lat tih na maelhmai a sae daengah ni ka daem uh eh.