Psalms 81
81:1 Aka mawt ham Asaph kah Gittith Mamih kah sarhi Pathen taengah tamhoe uh lamtah Jakob Pathen taengah yuhui uh lah.
81:2 Oldi te phoh uh lamtah kamrhing rhotoeng neh dingsuek thangpa tum uh.
81:3 Hlasae, hlalum vaengkah mamih khotue hnin ah tuki te ueng uh lah.
81:4 Hekah he Israel ham Jakob Pathen kah laitloeknah oltlueh coeng ni.
81:5 Ka yakming mueh ol, Egypt kho la a caeh vaengah Joseph ham a khueh olphong ni.
81:6 A laengpang dongkah hnorhih te ka khoe pah tih a kut khaw voh khui lamkah loeih.
81:7 Citcai khuiah nan khue tih nang kan pumcum sak. Khohum hlip lamkah nang kan doo tih Meribah tui ah nang kan loep kan dak. Selah
81:8 Ka pilnam loh hnatun lamtah kai ol te na hnatun atah Israel nang taengah ka laipai ni.
81:9 Na khuiah rhalawt pathen om boel saeh lamtah kholong pathen te bawk boeh.
81:10 Kai tah Egypt kho lamkah nang aka doek na Pathen Yahweh ni. Na ka ang lamtah kan hah sak eh.
81:11 Tedae ka pilnam loh ka ol he ya pawt tih Israel loh kai taengah naep pawh.
81:12 Te dongah amih te lungbuei thinthahnah taengla ka hlah tih amih kah cilkhih dongah pongpa uh.
81:13 Ka pilnam loh kai taengah hnatang koinih ka longpuei te Israel loh a vai sui dae.
81:14 A thunkha rhoek te a loe la ka kunyun sak vetih a rhal te ka kut neh ka thuung pah suidae.
81:15 BOEIPA kah a lunguet rhoek loh anih taengah mai a tum uh vetih amih kah khohnin khaw kumhal duela puh suidae.
81:16 Tedae cang tha te anih a cah suitih lungpang khui lamkah khoitui nang kang kum sak sue.