SIR 15
15:1 Boeipa aka rhih long tah he ni a saii eh, Tedongah olkhueng aka pom long tah cueihnah a dang ni.
15:2 Cueihnah tah anih aka doe a manu bangla a caeh pah vetih, anih te yulokung cadong bangla a doe ni.
15:3 Cueihnah loh anih te cangnah buh a tuh vetih, anih te cueihnah tui ok hamla a paek ni.
15:4 Anih tah cueihnah dongah hangdang vetih bung mahpawh. Anih te cueihnah dongah pangnal vetih yah pok mahpawh.
15:5 Cueihnah loh anih te a hui soah a pacuet vetih, hlangping lakli ah khaw a ka a ang ni.
15:6 Anih tah kohoenah neh omngaihnah rhuisam a hmuh vetih, dungyan kah ming then te khaw a pang ni.
15:7 Hlang ang loh cueihnah te dang pawt vetih, hlang tholh loh cueihnah te hmu mahpawh.
15:8 Cueihnah tah mangkhak taeng lamloh lakhla vetih, laithae khaw cueinah loh a poek mahpawh.
15:9 Hlangtholh rhoek kah hmuilai ah koehnah khaw cuen pawh Amih te boeipa taeng lamloh han tuei pai moenih.
15:10 Cueinah dongah koehnah khaw thoeng pai saeh, Te dongah Boeipa long ni tluep naep sak saeh.
15:11 “Ka cungkunah ham Boeipa loh a saii,” ti boeh. A thinah hno te a saii moenih.
15:12 “Amah loh kai khohmang la m'mawt,” ti boeh, Tholh he a ngoenah a om moenih.
15:13 Boeipa loh konawhnah boeih he a thinah, te bang te amah aka rhih loh a lungnah moenih.
15:14 A tongcuek kah hlang a suen vaengah te te ana om coeng, sayalh la tuek thainah khuiah ni hlang te ana khueh.
15:15 Na tuek coeng tah olpaek te khaw na tuem thai van vetih, Sayalh la tuek thainah olka dongah uepom la na saithani ni.
15:16 Nang hmai ah tui neh hmai khaw a khueh, mebang na tuek ham akhaw na kut yueng laeh.
15:17 Hlang takuem kah hingnah neh dueknah soah pakhat rhip loh a tuek bangla a paek bitni.
15:18 Boeipa kah cueihnah tah len tangkik, a thaomnah khaw khuet tih a cungkuem a hmuh thai.
15:19 A mik te amah aka rhih taengah a paelki tih, hlang kah pongthohnah boeih a ming.
15:20 Pakhat khaw halang hamla ol a paek moenih, te dongah pakhat khaw tholh saithainah a paek moenih.