SIR 16
16:1 Camoe yoka te muep ngaih boeh, lailak cadil soah khaw kohoe sak boeh.
16:2 Amih te a ping mai akhaw amih te uem boeh, amih khuiah Boeipa aka rhih a om hae pawt atah.
16:3 Amih kah thingthuelnah dongah pangtung boel lamtah, a hlangmi dongah khaw hangdang poeh. Pakhat he khaw thawngkhat lakah then thai tih, lailak ca khueh lakah tah cakol la duek he then ngai.
16:4 Rhung tue pawt ah na nguek uh hae vetih, buengrhuet a hmata uh te ni na ming hae eh.
16:5 Ka mik loh te bang hno te muep a hmuh coeng, he lakah langya ngai hno khaw ka hna loh a yaak coeng
16:6 Hlangtholh rhoek tingtunnah he tah hmai hlup banghui la om, Altha namtu taengah khaw kosi rhong ni.
16:7 Amah kho khosuen hlangtlung khaw khodawk a ngai moenih, amih te a tlung neh boe a koek uh dongah.
16:8 Amah loh Lot kah imben rhoek khaw a hnaih moenih, amih kah a thilen te a tuei dongah.
16:9 Namtu a cungku soah khaw lungma a ti voel moenih, Amih kah tholhnah te a toeng uh pawt dongah.
16:10 Rhalkap thawng ya rhuk te khawm ta a thinthah neh a tingtun uh dongah ni a phae.
16:11 Thinthah hlang pakhat khaw om mai tih, dantat mueh la om koinih tih khobae rhambae la om ni. Boeipa taengah rhennah neh kosi khaw om, amah loh a rhen thai bangla kosi khaw a hong thai.
16:12 A rhennah bangla a phaepnah khaw len bal Hlang he a khoboe tarhing ah lai a tloek.
16:13 Hlang tholh he kutbuem nen khaw loeih pawt vetih, Hlang cim kah uehnah te khaw hnawt bal mahpawh.
16:14 Rhennah bibi boeih soah a hmuen a khueh tih, pakhat rhip loh a khoboe tarhing ah a doe.
16:15 Boeipa loh Pharaoh thin a len sak tih amah te hmat pawh, Tedae vaan hmuiah tlungthang la bi a bi ngaih dongah ni.
16:16 A sitlohnah he tah a saihluen boeih teaengah tueng tih, a rhilam rhui neh khoyin khothaih khaw boeih a rhi.
16:17 “Boeipa taeng lamloh ka thuh uh coeng, hmuen sang lamkah u long nim a lungbuei ah kai n'khueh eh. Pilnam te yet lakli ah u long kai m'ming, saihluen toeklek na mueh kai he bang lam ka om?” ti boeh.
16:18 Anunae, vaan neh vaan sosang aih, tangrhom dung neh diklai khaw, Boeipa loh a hip vaengah tah thuen uh coeng.
16:19 Tlang neh diklai khoengim khaw, liva neh lingluei khaw a so lamloh a sawt coeng.
16:20 He a lungbuei neh aka pha hlang a om moenih, a khosing te uh long a thui thai lek eh?
16:21 Hli thae te aka hmuh thai a om pawt bangla, a bibi khaw a kum ngai tah boeih a phah oeng.
16:22 A khoboe tiktamnah te thui hamla unim aka om tih, te rhoek te u long a rhing thai pai eh? A oltloek he tah bahoeng hla rhoe pai ta.
16:23 Te rhoek te yakingnah aka voei rhoek kah poeknah ni kotalh neh longphaelh hlang kah poeknah tah hlang ang ni.
16:24 Ka ca aw hnatun lamtah mingnah la lo lah, ka ol he rhep hnatun ham pae lah.
16:25 Thuituennah he tluektluek bitni, Te dongah mingnah he phekphek thui.
16:26 A tongcuek lamkah a bibi dongah Boeipa loh a suen Te a saii vaengah a rhimong khaw a suem coeng.
16:27 A bibi te dungyan kah olkhueng neh a soepsoei coeng, a uknah he khaw cadilcahma boeih ham pawn ni. Amih te ponghalh uh pawt tih tawnba uh pawh Te dongah a hmakhuen khaw toeng uh pawh.
16:28 Amih te pakhat loh pakhat kalthalh la nen pawt tih, amih te Boeipa ol te aek uh tlaih pawh.
16:29 Te vaengah Boeipa loh diklai a sawt thuk coeng, Te dongah amah kah hnothen nen khaw a baetawt sak.
16:30 Diklai he mulhing hui boeih neh a thing tih, Te rhoek khaw diklai la mael uh.