SIR 2
2:1 Ka ca aw, Boeipa te thothueng ham na lo vaengah, namah noemcai hamla rhuengphong dae.
2:2 Na thinko te a dueng la khueh lamtah cak sak,
2:3 Amah te kop lamtah nong boeh, te daengah ni hnukhueng khohnin ah na thaihtak eh.
2:4 Na sokah aka tla sarhui te doe mai ngawn, tlayae tue vaengah khaw thinsen la om mai.
2:5 Sui khaw hmai neh a noemcai tih, doe koila a hmuh rhoek tah tlayaenah hmai neh a noemcai.
2:6 Amah te uepnah lamtah amah loh nang n'bom bitni, na longpuei mah a dueng la khueh lamtah amah te ngaiuep.
2:7 Boeipa aka rhih tih a rhennah aka rhing nang tah, phael boeh ne, na cungku tarha ve.
2:8 Boeipa aka rhih tih hno then aka ngaiuep nang tah, na kutdoe khaw hma mahpawh.
2:9 Boeipa aka rhih tih hnothen aka ngaiuep nang tah, omngaihnah neh sitlohnah khaw kuei ni.
2:10 Yankah rhuirhong te poek lamtah so lah, Boeipa dongah aka pangtung hlang he a ngaihlih bal nim? Boeipa rhihnah dongah aka tuem uh te a voeih bal nim? Amah aka khue te a hnalval nah bal pawn nim?
2:11 Boeipa tah thinphoei lungvat neh sitlohnah la om tih, tholnah khodawk a ngaih phoeiah, ngaihmang tue vaengah khaw a khang bal.
2:12 Anunae, rhalyawp thinko neh, yaikawt kut aih, caehlong panit ah aka cet hlangtholh aih te.
2:13 Anunae ko aka bawt tih pangtungnah aka khueh pawt aih te, Te dongah amih te hlipyingnah khueh mah pawh.
2:14 Anunae, nangmih yaknganah aka khueh pawt rhoek aih, Boeipa kah cawhnah a pai vaengah metlam na ti eh?
2:15 Boeipa aka rhih rhoek long tah a ol te a ngai pawt moenih, amah aka lungnah rhoek loh a khosing khaw a tuem.
2:16 Boeipa aka rhih loh Boeipa kongaih ni a tlap tih, amah aka lungnah hlang tah a olkhueng neh baetawt.
2:17 Boeipa aka rhih long tah a thinko a rhoekbah tih, a mikhmuh ah amah te kunyun coeng.
2:18 Boeipa kut dongla tla uh sih lamtah, hlang kut dongah boel saeh. A boeilennah neh a sitlohnah he vanat tih, a ming neh a bibinah khaw vanat la om.