SIR 3
3:1 Ka a rhoek aw, na pa kai ol he hnatun uh, a cuepmueih la pongtho lamtah, a suengnah la n'khoem saeh.
3:2 Boeipa loh ca rhoek soah a napa te a thangpom tih, ca rhoek soah saithainah khueh ham a manu te a cak sak.
3:3 Napa thangpom he tholh dawthnah la om tih,
3:4 A manu hinyahnah he tah kawn aka tung neh vai uh.
3:5 A napa aka thangpom hlang tah a ca rhangneh omngaih vetih, A thangthui uh vaengah khaw a hnatun pah ni.
3:6 Napa hinyahnah he tah hinglung vangnah la om tih, manu aka thangpom loh Boeipa ol te a ngai.
3:7 Te dongah a manu napa te a boei bangla bongyong saeh.
3:8 Na pa te ol neh, khoboe neh thangpom lah, te daengah nih a yoethennah te nang soah a pai eh.
3:9 Pa kah yoethennah loh ca rhoek kah im a thoh pah tih, manu kah thaephoeinah loh a khoengim a phil pah.
3:10 Na mah na thangpom neh na pakah mingthaenah saii boeh, na pa kah mingthaenah te nang thangpomnah moenih.
3:11 Ana pa kah thangpom nah khaw amah kah thangpomnah ni, te dongah a manu aka hinyahnah pawh camoe tah mingthae a phueih.
3:12 Ka ca aw, na pa te a patong vaengah khaw bom, a hing khui ah anih te kothet sak boeh.
3:13 a kopoek talh mai cakhaw a taengah thinsennah khueh mai, na thaomnah na khueh li vaengah khaw anih te hnoo boeh.
3:14 Pa taengah rhennah aka khueh tah hnilh pawt vetih, na tholhnah soah nang ham tholh hlahnah la om ni.
3:15 Nang kah citcai khohnin vaengah khaw, nang ham kolonah a poek vetih, khothen vaengkah cingmai bangla, na tholhnah khaw cing ni.
3:16 A napa aka hno he tah Pathen aka soehsalkung neh vai uh tih, A manu thintoek aka saii tah Boeipa loh thae a phoei thil.
3:17 Ka ca, na hutnah te kodonah neh saii, Pathen aka doe rhoek long nang n'lungnah bitni.
3:18 Len la na om atah, namah te kodo la muep na om a kuek. Te daengah ni Boeipa Mikhmuh ah kolonah na dang eh.
3:19 Muep phoe uh tih yan uh mai cakhaw, kodo long ni olhuep a hmuh sak.
3:20 Lennah he khaw Boeipa kah a tlungthangnah tih, kodo long tah Boeipa a thangpom.
3:21 Namah hamla aka kuel tloe te khaw tlap boel lamtah, na sarhi voelah aka om khaw khe boeh.
3:22 Nang hamla balae olpaek aka om tih, na ngoe mueh tah a thuh coeng mah thuep.
3:23 Nang voelkah olka dongah lai panit la phae sak boeh, na ming thai lakah a yet la nang te n'tueng coeng.
3:24 Amih kah kopoek loh longhmang la muep a mawt tih, poek tholnah loh a laitloeknah khaw a haeh sak coeng.
3:25 Ming a om pawt tah vangnah om pawh, mingnah a om pawt tah cueihnah om pawh.
3:26 Thin thah kah hmakhahnah khaw thae cakue tih, mueirhih aka lungnah khaw amah te ni a toh eh.
3:27 Lungbuei mangkhak he khaw ngaihmang loh a nan vetih, hlangtholh loh tholnah te tholhnah neh a koei.
3:28 Hlang oek te citcai loh a tlak thil vaengah, a hoeihnah om pawt tih, boethae thing te anih khuiah a yung cak.
3:29 Lungming kah lungbuei long tah thuidoeknah te a oep tih, hna aka kaeng tah cueih aka ngaih la om van.
3:30 Hmai tak khui kah tui a rhaeng bangla, bomcennah khaw tholh dawthnah la om.
3:31 Kolonah neh aka pae loh hmailong ham khaw a paek, A cungku vaengah khaw aka duelkung a hmuh ni.