Library · hlt

SIR 20

20:1 A tuetang mueh la hlang aka ho khaw om, Tedae kammueh la aka om hlang tah cueih. 20:2 Poi uengkueng lakah khaw ho phetlet khaw hno then pakhat la om van mai. 20:3 Amah tholh aka ming tah yahpok mahpawh. 20:4 Lunguen doela a then aka saii hlang he tah, tildil hlang loh hula poeih ham a hue neh vai uh. 20:5 Pilnam a ngen duem a om te hlang cueih la om tih, ol aka yet he tah hlang loh a tuei. 20:6 Pilnam a ngen tah a thui a om pawt dongah duem om, Te vaengah a ngen tah thui a ming pawt dongah duem om bal. 20:7 A tuengtang buelh a pha hlan atah hlang cueih he duem om, Hlang ang kah a hoem long tah a tuetang then a hlong sak. 20:8 Muep aka cal khaw tuei ham om tih, anaa amah ngaih la aka hnonah khaw thiinah ham om. 20:9 Rhainah khuikah hlang he a hmailong then dae, A cuhunah vaengah tah sungdaeh la a thoeng sak. 20:10 Kapaiah he nang ham hoeikhangnah om pawh, kapbaih he tah rhaepnit la thung ham ni a om. 20:11 Thangpomnah dongah aka palyal khaw om tih, a ngentah a tlayae hmuen lamloh kut a thoh thai. 20:12 A ngen loh tangka a yol neh muep a lai, Tedae voei rhih lah koep lai a sah. 20:13 Hlang cueih he ol yol dae lungloeinah kap tih, hlang ang kah olcal thingka tah a poeyoek mai ni. 20:14 Hlang ang kah kutdoe nang hamla a hong ni, anih te buhungnah voeirhih la dang ham ni a dan. 20:15 A yol a paek nen khaw muep a palawh tih, a ka te konglawng bangla a ang soeh. Tihnin ah hlang a pu tih a vuen ah tlek a suk, Te bang hlang te Pathen neh hlang loh a thiinah. 20:16 Hlang ang long tah “Paya om pawh” ka boethen khaw hlang loh uem pawh, ka buh aka ca nawn long khaw olthae la kai n'thui,” a ti ni. 20:17 Anih te hlang loh meyet hil nim a nueih nah ve. Anih long te a huen hno ni a khueh, amah loh a khueh pawt tetah thae la a thui. 20:18 Cirhong dongah paloe he hmuilai dongah paloe lakah then. Halang kah a cungkunah tah koeloe phoe, 20:19 Aka muen hlang he cil aka rhoep pawt neh lo uh, sawt rhoel kah hmuilai dongah ngawn tah bat yoeyah. 20:20 Hlang hmuilai dongkah thuidoeknah tah a hnawt pah, amah tuetang ah ol a thui pawt dongah ni. 20:21 Hlang he tholh pawt hamla khodaengnah loh a hoep a tlang, Te dongah a duem vaengah khaw yutloeinah om pawh. 20:22 Hlang he yahpohnah dongah khaw, hlang kah hinyahnah dongah khaw a hingnah a hlong. 20:23 Pakhat long tah a yah dongah paya neh ol a khueh, Tedae a hong lai dongah thunkha la a khueh van. 20:24 Laithae loh hlang te thae cakue la a khueh, khungrhap kah hmuilai dongah yawnyawn pha uh. 20:25 Hlanghuen pataeng laithae lakah tah rhoei pueng, Tedae te rhoi te bok poci ni. 20:26 Laithae loh mingthae la a mawt yoeyah tih, A khuiah yahyongnah om yoeyah. 20:27 Hlang cueih tah a ol loh a banhman sak tih, aka khuel khaw lungloeinah muep a dang. 20:28 Lai aka yawt long tah canghlom a hmoek, Tiktamnah neh lai aka tloeknah kolonah muep a dang. 20:29 Kolo sai neh kapbaih loh hlangcueih mik a dael sak tih, a toel pawt hamla a kam te khoep a khom pah. 20:30 Cueihnah a thuh neh hmuh mueh khohrhang, melae a phu aka tlo ngai eh? 20:31 A ang aka khoem hlang he tah, cueihnah aka phah hlang rhoek lakah then.