SIR 19
19:1 He tla aka saii hlang tah boei la om mahpawh, a yol khaw aka sawtsit tah a yol a yol ah voevoeh daeng ni.
19:2 Yu neh huta long he lungming khaw kho a hmaang sak, Pumyoi neh aka bol hlang khaw kutvit la poeh.
19:3 A koerang te yoop neh phol loh a rhawt pah vetih, kutvit hlang te tah boeih a yoop ni.
19:4 Hlang tloe tlek aka tangnah aih tah kopoek bawn tih, Aka tholh hlang khaw amah ni a tholhdalh sak.
19:5 Halangnah dongah aka omngaih tah boe yoeyah vetih Olka aka tuem hlang dingsuek la kho a sak ni.
19:6 Hlang thet aka thinah hlang tah, boethae khaw yol van ni.
19:7 Olca te koep khoep voel boeh, a cungkuem dongah na sudaeh voel mahpawh.
19:8 Na paya taengah khaw, rhal taengah khaw puen boeh, nang te n'tholh sak pawt atah te te phoe boeh.
19:9 Pakhat long khaw ya koinih nang n'dawn vetih, a tue a pha vaengah tah nang te n'thiinah ni.
19:10 Khat khat na yaak te namah taengah duek saeh, Rhal then sak te long te nang n'pook sak mahpawh.
19:11 Hlang ang loh tah khat khat a yaak vaengah, Huta camoe aka om bangla ca om bungtloh loh a kolek.
19:12 Palaa loh hlang phaitu a kah bangla hlang ang khuiah he thetnah ni a om.
19:13 Paya te dawt lah, anih loh saii pawt khaming, a saii oeh tah, koep saii voel boel saeh.
19:14 Na hui khaw dawt lah, anih loh thui pawt khaming, a thui oeh atah, koep koei voel boel saeh.
19:15 Paya khaw ol aka saii noek te tah rhep dawt, te dongah na yaak sarhui te boeih tangnah boeh.
19:16 Hlang a cai muehla paloe thai ta, Olcal aka tholh mueh hlang he a om moenih.
19:17 Amah te na cawh hlanah na imben khaw dawt dae, Te te Khohni kah olkhueng nen mah laitloek saeh.
19:18 Boeipa rhihnah tah lunghoihnah a kung la om, Te dongah cueinah loh Boeipa kah lungnah a dang sak.
19:19 Boeipa kah olkhueng mingnah long tah Khosaknah a rhimong te a paek tih, Omngaih la aka vai hlang long tah, hingnah thing thai dognah a kohoe.
19:20 Boeipa rhihnah tah cueihnah a cuinah la om tih, olkhueng soepsak long he cueihnah a cung sak.
19:22 Halang kah mingnah he tah cueihnah moenih, hlang tholh rhoekkah cilsuep dongah cuepmueihnah a om moenih.
19:23 Te te tueilaeh aka kap cueinah la om tih cueihnah a vawt coeng tah hlang ang lamni a poeh.
19:24 Yakmingnah loh vawt dae Pathen aka rhih he tah, Mingnah muep sang tih olkhueng aka phaelh lakah then.
19:25 Cuei hueltue mai cakhaw a tiktamnah a om pawt atah, Dumlai te na hamla a kolo neh pilnam aka phae la khoeng om.
19:26 Hlang thae te bakop tih nguekcoi sitoe cakhaw, A khui ah thailatnah hoengla baetawt.
19:27 A mael hmai a buenglueng tih hnatun khaw ngaih pawh. Tedae khat long a ming pawt vaengah tah, nang soah lamhma hang hul ni.
19:28 A thadueng vawt sitoe cakhaw anih te hlang tholh la khueh, A tuethen a dang atah boethae saii hamla tonga mahpawh.
19:29 Hlang he a sohman mueimae dongah phoe mai, aka khuel hlang he khaw, maelhmai rhoi a hum vaengah mingpha la om mai coeng.
19:30 Hlang a nueih cal dongah khaw, a pongthoh dongah khaw, a pueinak dongah khaw u lae tila mingpha mai.