SIR 28
28:1 Tawnlonah aih khaw Boeipa kah tawnlohnah ni a dang, Amih kah tholhnah te Boeipa loh khak a khoem coeng.
28:2 Na imben loh thae a saii te khaw khodawkngai mai, tedaengah ni na thangthui vaengah na tholhnah han hlah eh.
28:3 Hlang long a hui taengah thintoeknah tlal khueh koinih, metlam lae Boeipa taengkah hoeihnah te a lamtawn eh?
28:4 Hlang he amah bangla a tloe taengah rhennah khueh pawt koinih, amah tholnah soah tholhhlahnah te metlam a bih thai eh?
28:5 Pumsa saloela kosi te puet vuelh koinih, a tholhnah soah u long lae tholh dawthnah boirhaem te a saii pa eh?
28:6 Na hing a bawtnah te poek lamtah rhalcak te khueh boeh, Pocinah neh dueknah te poek lamtah, aka thuem olpaek te khaw poek lah.
28:7 Olpaek te poek lamtah a imben taengah thintoek sak boeh, Khohni kah paipi te poek lamtah, a thae bueng te dawn boeh.
28:8 Olpungnah rhael lamtah na tholhnah yol ni, thinsanah long khaw hmai ni a puek sak.
28:9 Hlang tholh loh paya khaw a paa sak tih, rhoepnah lakliah khoponah ni a soem.
28:10 Hmaitui a pueh vaengah tah, hmai ni a tak, Mangkhaknah a pueh vaengah, olpungnah rhoeng. Hlang he a thadueng a puh vaengah a thintoek yet tih, a khuehtawn a puh vaengah a kosi khaw rhoeng.
28:11 Koeloe olpungnah loh hmai a puek sak tih, koeloe oelnah loh thii a long sak.
28:12 Hmaili te na hmut koinih tak vetih, na timthoih koinih duek ni. Te rhoi te na ka lamkah ni a thoeng.
28:13 Hlang thet neh lai panit la aka phae tah thae a phoei thil coeng, Te long ni hlang a yet kah rhoepnah khaw a phae.
28:14 Caemtuhnah loh hlang muep a hinghuen tih, amih te namtong taeng lamloh namtong taengla a thaek. Te long te khopuei vongcak khaw a phae tih, hlanglen kah im khaw a palet mah.
28:15 Caemtuhnah loh hlang haam nu khaw im lamloh a vai tih, amih kah thatlohnah phu te khaw a poeih pah.
28:16 Caemtuh hlamla lu aka thuk hlang tah duem pawt vetih, rhoepnah nen khaw khosa mahpawh.
28:17 Rhuihet neh a vuek vaengah a hma ni a om, te ol neh a vuek vaengah tah rhuh a paep sak.
28:18 Cunghang dongah aka cungku he yet coeng, Tedae olka dongkah aka cungku tah a tluk moenih.
28:19 Te dong lamkah aka khoem uh hlang khaw, a thintoek a yan hlang pawt te khaw, Te kah hnamkun loh a nan hlang pawt khaw, te kah hloong dongah a khoh pawt hlang khaw a yoethen.
28:20 Te kah hnamkun tah thi hnamkun la om tih, hloong khaw rhohum hlong la om bal.
28:21 Te dueknah khaw a thae dueknah la om tih, te ham tah hell ni a om coeng.
28:22 Hlacim aka vuei thai thaomnah he a om moenih, amih te hmaisai long khaw dom thai mahpawh.
28:23 Tedae Boeipa aka hnawt tah hmuilai kah thaomnah dongah cungku ni. Te vaengah amih te a dom vetih paa voel mahpawh. Amih taengah sathueng bangla a tueih vetih, Amih te kaihlaeng bangla a paco ni.
28:24 Na koerhang te hling neh na mak bangla, na ka dongah thohkhaih neh thohkalh khaw khueh van.
28:25 Sui ngun te tawh na bang thil bangla, na ol ham khaw coi neh coilung khueh pah.
28:26 Na hmuilai dongah a lolh pawt ham ngaithuen, te daengah ni rhongngol la nang aka mah te maeh la a cungku eh.